ໃນທ້າຍອາທິດຜ່ານມານີ້; ອໍານາດການປົນຄອງ ແລະ ພໍ່ແມ່ປະຊາຊົນ ບ້ານໂພນຜາງ ທີ່ຂຶ້ນກັບເມືອງອາດສະພັງທອງ, ແຂວງສະຫວັນນະເຂດ ໄດ້ພ້ອມພຽງກັນ ຈັດງານບຸນປະເພນີ ບຸນຄູນຂວັນເຂົ້າໃຫ່ຍ ຢ່າງຄຶກຄື້ນມ່ວນຊຶ່ນ. ໂດຍການເຂົ້າຮ່ວມຂອງ ທ່ານ ລໍາທອງ ຂອບສີລາວົງ ເຈົ້າເມືອງ ອາດສະພັງທອງ ພ້ອມດ້ວຍຄະນະ ແລະ ພໍ່ແມ່ປະຊາຊົນຊາວບ້ານໂພນຜາງ ແລະ ພໍ່ແມ່ປະຊາຊົນບ້ານໃກ້ຄຽງກໍ່ໄດ້ເຂົ້າຮ່ວມ.
ໃນກິດຈະກໍາໃນງານບຸນຄັ້ງນີ້; ກໍ່ໄດ້ມີການກາບໄຫ້ວພຣະຮັບສິນ ເຊີນເອົາຂວັນເຂົ້າ ແລະ ກໍ່ໄດ້ມີການແຫ່ຂວັນເຂົ້າຢ່າງເປັນຂະບວນຟົດຟື້ນມ່ວນຊື່ນ ໂດຍມີຂະບວນການຟ້ອນເປັນໝູ່ຄະນະ, ຂະບວນກອງຕຸ້ມ ແລະ ກອງຫາງ ໄດ້ພ້ອມກັນແຫ່ຂວັນເຂົ້າຈາກຫ້ອງການກຸ່ມບ້ານໂພນຜາງ ເຂົ້າໄປຫາໃນວັດ.
ຊຶ່ງທ່ານ ສະລັ່ນຢາ ອ້ຽງໂສພາ ແນວໂຮມບ້ານໂພນຜາງ ກໍ່ໄດ້ເລົ່າເຖິງປະຫວັດຄວາມເປັນມາໂດຍຫຍໍ້ຂອງບຸນກອງເຂົ້າ ຢ່າງມີຄວາມໝາຍ ແລະ ຄວາມສໍາຄັນວ່າ: ຖ້າວ່າພວກເຮົາຢາກກິນເຂົ້າຕ້ອງອອກແຮງງານ ເຮັດໄຮ່, ເຮັດນາ ຈຶ່ງໄດ້ກິນ, ຖ້າມີຫຍ້າເກີດປົນ, ຝົນບໍ່ດີນໍ້າບໍ່ລ້ຽງຕົ້ນເຂົ້າກໍ່ຈະຕາຍ, ເມື່ອເຖິງຍາມເກັບກ່ຽວເຂົ້າກ່ອນຈະຕີ, ຈະຢຽບ, ຈະຝາດເຂົ້າໃຫ້ຂໍຂະມາຄາລາວະຂໍອະໂຫສິກໍານໍາເຂົ້າສາກ່ອນ, ຖ້າຫາກຟາດແລ້ວ, ຕີແລ້ວກ່ອນຈະເອົາເຂົ້າມາເຮືອນ, ມາເລົ່າເຂົ້າຕ້ອງຜູກຂວັນເຂົ້າສາກ່ອນ. ຍ້ອນເຫດຜົນດັ່ງກ່າວນີ້; ອໍານາດການປົກຄອງ ແລະ ພໍ່ແມ່ປະຊາຊົນບ້ານໂພນຜາງຈຶ່ງໄດ້ຈັດງານບຸນສູດຂວັນເຂົ້າເປັນປະຈໍາໃນທຸກໆປີ.
ໃນການຈັດບຸນຄູນຂັວນເຂົ້າໃນຄັ້ງນີ້ ອໍານາດການປົກຄອງ ແລະ ພໍ່ແມ່ປະຊາຊົນບ້ານ ໂພນຜາງ ແມ່ນໄດ້ນໍາເອົາເຂົ້າໃນເຮືອນຂອງຕົນມາກອງໂຮມກັນ ໄດ້ເຂົ້າທັງໝົດ 9.000 ກິໂລ, ເທົ່າກັບ 9 ໂຕນ ຄິດເປັນເງິນທັງໝົດ 18.000.000 ກີບ. ທັງນີ້ ເພື່ອເປັນການອະນຸລັກຮັກສາຮີດຄອງປະເພນີທີ່ປູ່ຍ່າ, ຕາຍາຍໄດ້ປະຕິບັດກັນມາຕັ້ງແຕ່ບູຮານນະການບໍ່ໃຫ້ເຊື່ອມຫາຍ ແລະ ທັງເປັນການປູກຈິດສໍານຶກໃຫ້ລູກຫຼານໄດ້ຮັບຮູ້ເຖິງຄວາມໝາຍຄວາມສໍາຄັນຂອງເຂົ້າໃຫ້ຫຼາຍຂຶ້ນກວ່າ.
Editor: ນັກຂ່າວເມືອງອາດສະພັງທອງ
