ຕາມການລາຍງານຂອງຫນັງສືພິມວຽງຈັນໃຫມ່ ບອກວ່າ: ກອງປະຊຸມກ່ຽວກັບລາຍງານຜົນການຈັດຕັ້ງປະຕິບັດ ແລະ ຮັບຮອງແຜນ ປະຈຳປີ 2018 ລາຍງານຄວາມຄືບໜ້າການຈັດຕັ້ງປະຕິບັດ ແລະ ແນວທາງການສະ ເໜີຊື່ປ່າສະຫງວນແຫ່ງຊາດຫີນໜາມໜໍ່ ເຂົ້າເປັນມໍລະດົກໂລກ ທາງດ້ານທຳມະຊາດແຫ່ງທຳອິດຂອງລາວ ເພື່ອຮັບຮອງເອົາແຜນກະກຽມສະເໜີຊື່ເຂົ້າເປັນມໍລະດົກໂລກ ແລະ ແຜນຄຸ້ມຄອງຮ່ວມປ່າສະຫງວນແຫ່ງຊາດ ຫີນ ໜາມໜໍ່ ປະຈໍາປີ 2018 ໄດ້ຈັດຂຶ້ນວັນທີ 26 ມັງກອນ 2018 ທີ່ແຂວງຄຳມ່ວນ ເປັນປະທານຂອງທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ ຄຳສີ ອຸດທິວົງ ຮອງເຈົ້າແຂວງຄຳມ່ວນ ມີພາກສ່ວນທີ່ກ່ຽວຂ້ອງ ເຂົ້າຮ່ວມ.
ຊຶ່ງໃນວັນທີ 10 ມັງກອນ 2018 ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ລາວ ແລະ ກະຊວງວັດທະນະທຳກີລາ ແລະ ທ່ອງທ່ຽວ ຫວຽດນາມ ໄດ້ລົງນາມໃນບົດບັນທຶກຄວາມເຂົ້າໃຈ ທີ່ນະຄອນຫຼວງຮ່າໂນ້ຍ ໂດຍຫວຽດນາມຈະສະໜັບສະໜູນ ການສະເໜີຊື່ເອົາປ່າສະຫງວນແຫ່ງຊາດຫີນໜາມໜໍ່ ເຂົ້າເປັນມໍລະດົກໂລກຮ່ວມຊາຍແດນ ກັບອຸທິຍານແຫ່ງຊາດ ຟອງຍາແກບ່າງ ໃນແຂວງກວາງບິ່ງ ທີ່ມີຊາຍແດນຕິດກັບປ່າສະຫງວນແຫ່ງຊາດຫີນໜາມໜໍ່ ແຂວງຄຳມ່ວນ ເຊິ່ງອຸທິຍານແຫ່ງຊາດ ຟອງຍາແກບ່າງ ໄດ້ຮັບການຮັບຮອງເປັນມໍລະດົກໂລກທາງທຳມະຊາດ ເຊິ່ງບົດບັນທຶກຄວາມເຂົ້າໃຈສະບັບນີ້ ໄດ້ນຳສູ່ການປຶກສາຫາລືກ່ຽວກັບຂະບວນການກະກຽມເອກະສານ ການສະເໜີຊື່ເຂົ້າເປັນມໍລະດົກໂລກ ເຊິ່ງປະກອບມີການສຶກສາຄົ້ນຄວ້າວຽກງານເຕັກນິກວິຊາການສະເພາະດ້ານ ແລະ ການສ້າງຄວາມເຂັ້ມແຂງເຂົ້າໃນແຜນການຄຸ້ມຄອງປ່າສະຫງວນແຫ່ງຊາດຫີນໜາມໜໍ່ ໂດຍຜ່ານການຈັດຕັ້ງປະຕິບັດແຜນວຽກ ປະຈຳປີ 2018 ຂອງປ່າສະຫງວນແຫ່ງຊາດຫີນໜາມໜໍ່.
Editor: ນັກຂ່າວເມືອງອາດສະພັງທອງ
