ສະຖານທີ່ທ່ອງທ່ຽວ ທາງທໍາມະຊາດ ໃນປະເທດລາວເຮົາ ແມ່ນມີຄວາມສວຍສົດງົດງາມ ແລະ ມີຢ່າງຫລວງຫລາຍ. ບາງສະຖານທີ່ກໍ່ໄດ້ຖືກຄົ້ນພົບແລ້ວ ແລະ ບາງສະຖານທີ່ຍັງບໍ່ທັນຄົ້ນພົບເທື່ອ.
ສໍາລັບ ສະຖານທີ່ນໍ້າຕົກຕາດຜາສ້ວມ, ທີ່ເມືອງບາຈຽງ ແຂວງ ຈໍາປາສັກ ແມ່ນເປັນນໍ້າຕົກຕາດ ທີ່ມີຄວາມສວຍງາມທີ່ໄຫຼຕາມຜາຫີນ ຈຸດພິເສດຂອງນໍ້າຕົກຕາດແຫ່ງນີ້ ເປັນຜາຫີນທີ່ຕັ້ງລຽນກັນເປັນລະບຽບ ຄວາມສູງປະມານ 5 ຫາ 7 ແມັດ, ເປັນນ້ຳຕົກທີ່ໄຫຼມາຈາກຫ້ວຍຈຳປີ ເຊິ່ງມີຈຸດກຳເນີດ ຈາກພູເທວະດາ, ເມືອງປາກຊ່ອງ. ໄດ້ໄຫຼຜ່ານຫຼາຍໝູ່ບ້ານ ເປັນລັກສະນະກະແສນ້ຳໄຫຼລົງສູ່ແທ່ນຫີນສີດຳ ທີ່ເກີດຈາກລາວາພູເຂົາໄຟ ທີ່ເຢັນຕົວ ເຊິ່ງທຳມະຊາດໄດ້ປັ້ນແຕ່ງຢ່າງສວຍງາມ. ໃນບໍລິເວນເຂດນໍ້າຕົກເພີ່ນໄດ້ເອີ້ນວ່າ: ປະຕູສ້ວມໃນພາສາຊົນເຜົ່າ ຄໍາວ່າ “ສ້ວມ” ໝາຍເຖິງຫ້ອງນອນ ທີ່ກັ້ນໄວ້ສຳລັບລູກສາວ, ລູກຊາຍ. ສ່ວນຄຳວ່າ “ຕາດ” ໝາຍເຖິງລານຫີນເປັນຂັ້ນ. ດັ່ງນັ້ນ ຄຳວ່າ “ຜາສ້ວມ” ແມ່ນມີຄວາມໝາຍວ່າ: “ນ້ຳຕົກຕາດຫີນຕັ້ງທີ່ມີລັກສະນະສູງຊັ້ນ ຄ້າຍຄືຫ້ອງຫໍ ທີ່ຂັ້ນເອົາໄວ້ສຳລັບລູກສາວ, ລູກຊາຍ. ສໍາລັບ ຄວາມໝາຍນີ້ ແມ່ນມີ ເລື່ອງເລົ່າປະລໍາປະລາ ເລົ່າຂານກັນມາແຕ່ດົນນານ ເລື່ອງ: “ສາວລາວລຸ່ມ ແລະ ໜຸ່ມລາວເທິງ”.
ສະນັ້ນ ປີທ່ອງທ່ຽວລາວ 2018 ຈຶ່ງຖືເອົາໂອກາດນີ້ ໃຫ້ບັນດາທ່ານ ລວມເຖິງນັກທ່ອງທ່ຽວ ທັງພາຍໃນ ແລະ ຕ່າງປະເທດ ຫາໂອກາດໄປສໍາຜັດດ້ວຍຕາທ່ານເອງ ກັບສະຖານທີທ່ອງທ່ຽວນຳ້ຕົກຕາດຜາສ້ວມ, ຢູ່ທີ່ເມືອງບາຈຽງ, ແຂວງຈໍາປາສັກ.
Editor: ດາວໄຊ ສີວິໄລ
