ເມື່ອເວົ້າເຖິງເວລາເດີນທາງໄປທ່ຽວ ຢູ່ຕາມສະຖານທີທ່ອງທ່ຽວຕ່າງໆ ທີ່ຂາດບໍ່ໄດ້ກໍ່ຄື ສະຖານທີພັກຜ່ອນ ສະນັ້ນ ເຮືອນພັກ ຜາມ່ານວິວ ຈຶ່ງເນັ້ນການບໍລິການ ພ້ອມແນະນຳໃຫ້ຂໍ້ມູນຂ່າວສານ ກ່ຽວກັບແຫລ່ງທ່ອງທ່ຽວຕ່າງໆພາຍໃນເມືອງຄູນຄຳ, ແຂວງຄໍາມ່ວນ ໃຫ້ແກ່ນັກທ່ອງທ່ຽວ ແລະ ໄດ້ຮັບຄວາມນິຍົມຈາກນັກທ່ອງທ່ຽວ ທັງພາຍໃນ ແລະ ຕ່າງປະເທດເປັນຢ່າງດີ.
ທ່ານນາງ ຊະນະນິກອນ ແກ້ວທອງນິນ ເຈົ້າຂອງສະຖານທີ່ພັກຜ່ອນ ເຮືອນຜັກ ຜາມານວິວ ຕັ້ງຢູ່ບ້ານຄູນຄໍາ, ເມືອງຄູນຄຳ, ແຂວງຄຳມ່ວນ ໄດ້ເປີດເຜີຍກັບຜູ້ສື່ຂ່າວເມືອງລາວວັນນີ້ ວ່າ: ຜາມ່ານວິວ ໄດ້ຮັບການສ້າງຕັ້ງຂຶ້ນໃນປີ 2008 ໃນເບື້ອງຕົ້ນ ແມ່ນບໍ່ໄດ້ເປີດໃຫ້ບໍລິການແຂກຄົນທົ່ວໄປມາພັກ ຈະໃຫ້ພັກແຕ່ແຂກຂອງບໍລິສັດ ເທີນຫີນບູນ ເທົ່ານັ້ນ ເນື່ອງຈາກວ່າໄດ້ເຮັດສັນຍາເຊົ່າກັບບໍລິສັດດັ່ງກ່າວ. ພໍມາຮອດປີ 2015 ຈິ່ງໄດ້ເປີດແບບສົມບູນແບບ ເພື່ອຮອງຮັບແຂກຄົນທົ່ວໄປທັງພາຍໃນ ແລະ ຕ່າງປະເທດ, ພ້ອມທັງ ໃຫ້ຄຳແນະນຳຂໍ້ມູນຂ່າວສານການທ່ອງທ່ຽວຕ່າງໆພາຍໃນເມືອງແກ່ນັກທ່ອງທ່ຽວ, ທັງໄດ້ເປີດເວບໄຊຂອງເຮືອນພັກ ເພື່ອອຳນວຍຄວາມສະດວກດ້ານຂໍ້ມູນຂ່າວສານ ແລະ ນັກທ່ອງທ່ຽວ ຍັງສາມາດສັ່ງຈອງຫ້ອງພັກໄດ້ທາງເວບໄຊ ຫລື ອີເມວ ຂອງເຮືອນພັກໄດ້.
ເຈົ້າຂອງສະຖານທີ່ພັກຜ່ອນ ເຮືອນຜັກຜາມ່ານວິວ ຍັງໃຫ້ຮູ້ອີກວ່າ: ເພື່ອເປັນການຮອງຮັບໃຫ້ແກ່ປີທ່ອງທ່ຽວລາວ 2018 ນີ້, ພວກເຮົາໄດ້ມີການປັບປຸງຫລາຍດ້ານເປັນຕົ້ນ ແມ່ນໄດ້ເພີ່ມຈຳນວນຫ້ອງພັກ, ປັບປຸງສະພາບແວດລ້ອມອ້ອມຂ້າງໃຫ້ມີຄວາມສວຍງາມ, ເພີ່ມຂອດບໍລິການ ໂດຍສະເພາະ ຈັດໃຫ້ມີອາຫານເຊົ້າແກ່ນັກທ່ອງທ່ຽວທີ່ມາພັກເຊົາຢູ່ພາຍໃນເຮືອນພັກ ແລະ ໃຫ້ບໍລິການລົດເຊົ່າ ແກ່ນັກທ່ອງທ່ຽວ.
ທ່ານນາງ ຊະນະນິກອນ ແກ້ວທອງນິນ ຍັງໄດ້ຝາກເຖິງບັນດານັກທ່ອງທ່ຽວ ກໍຄືແຂກບ້ານໃກ້, ບ້ານໃກ ແລະ ແຂກຕ່າງປະເທດທີ່ມີຄວາມສົນໃຈຢາກມາທ່ອງທ່ຽວ ສະຖານທີ່ທ່ອງທ່ຽວຕ່າງໆຢູ່ເມືອງຄູນຄຳ ໂດຍສະເພາະແມ່ນ ຖ້ຳກອງລໍ-ນາຕານ ກໍສາມາດມາພັກເຊົາຢູ່ ຜາມ່ານວິນ ຂອງພວກເຮົາໄດ້, ພວກເຮົາຍິນດີຕ້ອນຮັບທຸກໆທ່ານ ແລະ ພ້ອມທີ່ຈະໃຫ້ຂໍ້ມູນຂ່າວສານການທ່ອງທ່ຽວທີ່ສຳຄັນແກ່ພວກທ່ານ.
Editor: ຕະວັນ ແສງສະຫວັນ
