ແຂວງ ສະຫວັນນະເຂດ ເປັນດິນແດນເກົ່າແກ່ ແຫ່ງອາດີດຂອງອານາຈັກສີໂຄດຕະບູນ ທີ່ມີຄົນອາໃສຢູ່ແຕ່ບູຮານນະການ ແລະ ເປັນອີກແຂວງໜຶ່ງໃນ 18 ແຂວງ ທີ່ຢູ່ທາງພາກກາງຂອງປະເທດລາວເຮົາ ທີ່ອຸດົມສົມບູນໄປດ້ວຍຊັບພະຍາກອນທຳມະຊາດ, ວັດທະນະທໍາ ແລະ ຮອງຮອຍທາງດ້ານປະຫັວດສາດທີ່ມີມາແຕ່ດົນນານ.
ແຂວງ ສະຫວັນນະເຂດ ເປັນອີກແຂວງໜຶ່ງທີ່ມີສະຖານທ່ອງທ່ຽວ ທີ່ຫນ້າສົນໃຈ ເຊັ່ນ: ທາງດ້ານທຳມະຊາດ, ປະຫວັດສາດ ແລະ ວັດທະນະທໍາ.
ສໍາລັບແຫລ່ງທ່ອງທ່ຽວທາງດ້ານທໍາມະຊາດ ພາຍໃນແຂວງ ເຊິ່ງມີຫລາຍແຫ່ງທີ່ຫນ້າສົນໃຈໃນການທ່ອງທ່ຽວ ເປັນຕົ້ນແມ່ນ: ນ້ຳຕົກຕາດສະໂຄ່ຍ, ນໍ້າຕົກຕາດສະແລ, ທໍາມະຊາດແກ້ງລີນ, ແກ້ງຫຼວງ, ແກ້ງສາມມັດແຕກ, ແກ້ງກົງພະນັງ, ຝາຍສຸຍ, ທໍາມະຊາດພູຊ້າງແຮ່ ແລະ ອື່ນໆ.
ສ່ວນແຫລ່ງທ່ອງທ່ຽວທາງດ້ານປະຫວັດສາດ ແມ່ນມີ: ອານຸສາວະລີນັກຮົບນິລະນາມ, ຮອງຮອຍເສັ້ນທາງປະຫວັດສາດ,ຮອງຮອຍຖານທັບຝຣັ່ງ, ຫຼັກເສເມ, ຕາດໄຮ, ພະທາດນາງລາວ, ຫໍວາງສແດງກະດູກໃດໂນເສົາ, ພະທາດອຸມຸງ, ເຮືອນຫີນ ແລະ ຫີນສາມເສົ້າ. ສ່ວນທາງດ້ານວັດທະນະທຳ ແມ່ນມີ: ພະທາດອິງຮັງ ແມ່ນຕັ້ງຢູ່ ບ້ານທາດ ເຊິ່ງຫ່າງ ຈາກເທດສະບານເມືອງ ເຂົ້າໄປປະມານ 15 ກິໂລແມັດ. ເປັນເຈດີ ທີ່ບັນຈຸກະດູກສັນຫຼັງຂອງພະພຸດທະເຈົ້າ ເປັນມໍລະດົກຂອງຊາດ, ເປັນພະທາດທີ່ສັກສິດ ແລະ ເປັນທີ່ສັກກະລະບູຊາ ຂອງຊາວພຸດລາວ. ນອກນັ້ນຍັງມີຫໍໄຕປີດົກ, ວັດພະທາດໂພ່ນ, ວັດພຣະເຈົ້າອົງແສນ, ຖໍ້າພະ, ວັດທະຈານລາຍ, ວັດໄຊຍະພູມ, ວັດເກົ່າເຊໂປນ, ຫັດຖະກໍາ ທົງລະສິນ ແລະ ເຮືອນເກົ່າຝຣັ່ງ.
ນອກຈາກນີ້ ຍັງງານບຸນປະເພນີວັດທະນະທໍາບັນດາເຜົ່າ ແລະ ໄດ້ຈັດຂຶ້ນໃນທຸກໆປີ ເພື່ອສົ່ງເສີມການທ່ອງທ່ຽວ ແລະ ເພື່ອຮັກສາຮີດຄອງປະເພນີວັດທະນະທຳ. ສະນັ້ນ ປີທ່ອງທ່ຽວລາວ 2018 ນີ້ ຈຶ່ງຖືເອົາໂອກາດນີ້ ໃຫ້ບັນດາທ່ານ ລວມໄປເຖິງນັກທ່ອງທ່ຽວ ທັງພາຍໃນ ແລະ ຕ່າງປະເທດ ຫາໂອກາດໄປສໍາຜັດດ້ວຍຕາຂອງທ່ານເອງ. ນອກຈາກນັ້ນ ສະຫວັນນະເຂດ ຍັງມີຄໍາຂັວນທີ່ວ່າ: ສະຫວັນນະເຂດຜືນແຜ່ນດິນຄຳ ວັດທະນະທຳ ຫຼາຍເຜົ່າຊົນລ້ຳເລີດ ແຫ່ງບໍ່ເກີດໄດໂນເສົາຮ້ອຍລ້ານປີ ປູສະນິຍະສະຖານ ພະທາດອິງຮັງງາມສະຫງ່າ ໂສມນາມວ່າ ຖິ່ນກຳເນີດວິລະບູລຸດແຫ່ງຊາດລາວ.
Editor: ດາວໄຊ ສີວິໄລ
