ພິທີປະກາດບ້ານໃຫ່ຍສົບເລົ້າ, ເມືອງຫົວເມືອງ ແຂວງຫົວພັນ ເປັນບ້ານສີສັນຕົວເມືອງນ້ອຍ ໃນຊົນນະບົດ ໄດ້ຈັດຂຶ້ນໃນຕອນເຊົ້າວັນທີ່ 8 ກຸມພາ 2018 ຢູ່ທີ່ບ້ານດັ່ງກ່າວຢ່າງເປັນທາງການ ຕາມຂໍ້ຕົກລົງສະບັບເລກທີ 1249/ຈຂ ລົງວັນທີ 29 ກັນຍາ 2017 ແລະ ສະບັບເລກທີ162 /ຈຂ ລົງວັນທີ່ 5 ກຸມພາ 2018 ວ່າດ້ວຍປະກາດ ແລະ ຮັບຮອງເອົາບ້ານໃຫ່ຍສົບເລົ້າ ເປັນສີສັນຕົວເມືອງນ້ອຍໃນຊົນນະບົດ ເຊີ່ງເປັນບ້ານທຳອິດຂອງແຂວງົວພັນ.
ທ່ານນາງ ສີ ພອນມີໄຊ ປະທານປົກຄອງບ້ານສົບເລົ້າ ໄດ້ສະຫຼຸບການຊີ້ນໍາ-ນໍາພາໃນໄລຍະຜ່ານມາ ແລະ ວາງທິດທາງແຜນການສູ້ຊົນ ແຕ່ນີ້ຮອດປີ 2020 ເຊັ່ນ: ວຽກງານນຳພາການເມືອງ-ແນວຄິດ, ວຽກງານປັບປຸງກົງຈັກການຈັດຕັ້ງ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການຕັ້ງພູມລໍາເນົາ, ວຽກງານເສດຖະກິດ ແກ້ໄຂຊີວິດການເປັນຢູ່ ແລະ ວຽກງານວັດທະນະທຳ-ສັງຄົມ. ບ້ານສົບເລົ້າມີ 159 ຄອບຄົວ, ມີພົນລະເມືອງທັງໝົດ 831 ຄົນ ແລະ 95% ເປັນເຜົ່າລາວລຸ່ມ ອາຊີບຕົ້ນຕໍແມ່ນບໍລິການຮ່າງຮ້ານກິນດຶມ ,ເຮືອນພັກ, ຄ້າຂາຍຍ່ອຍເຄື່ອງອຸດສາຫະກຳ ເປັນກຽດມອບໃບຢັ້ງຢຶນບ້ານສົບເລົ້າ ເປັນບ້ານສີສັນຕົວເມືອງນ້ອຍ ໃນຊົນນະບົດ ແມ່ນທ່ານນາງ ແພງ ກັນຍາພີມ ຮອງເລຂາພັກແຂວງ-ຮອງເຈົ້າແຂວງໆຫົວພັນ.
ໂອກາດນີ້ທ່ານຮອງເລຂາພັກແຂວງ-ຮອງເຈົ້າແຂວງ ຍັງໄດ້ເນັ້ນໜັກໃຫ້ຄະນະພັກ-ອຳນາດການປົກຄອງຈົ່ງສຶບຕໍ່ສຶກສາອົບຮົມດ້ານການເມືອງ-ແນວຄິດພໍ່ແມ່ປະຊາຊົນໃຫ້ມີຄວາມໜັກແໜ້ນ, ນຳພາ, ຄຸ້ມຄອງ ແລະ ບໍລິຫານບ້ານ ໃຫ້ໄປຕາມທິດ 3 ສ້າງ, ປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີຄວາມເຂັ້ມແຂງ, ພັດທະນາເສດຖະກິດໃຫ້ມີລາຍຮັບເພີ່ມຂື້ນກ່ວາເກົ່າ, ປັບປຸງບູລະນະທີ່ຕັ້ງພູມລຳເນົາ ໃຫ້ຫັນເຂົ້າສູ່ຄວາມເປັນລະບຽບຮຽບຮ້ອຍ ແລະ ສວຍງາມ ກາຍເປັນຕົວເມືອງໜ້າຢູ່, ໜ້າຊົມຕະຫຼອດໄປ.
ຕອນທ້າຍຂອງພິທີ ທ່ານນາງ ແພງ ກັນຍາພີມຮອງເລຂາພັກແຂວງ-ຮອງເຈົ້າແຂວງ ແລະ ທ່ານພຸດພັນ ແກ້ວມີໄຊ ກຳມະການພັກແຂວງ-ເຈົ້າເມືອງໆຫົວເມືອງ ໄດ້ເປັນກຽດຕັດແຖບຜ້າເປີດປ້າຍ ແລະ ລັ່ນຄ້ອງ 9 ບາດເພື່ອເປັນສິລິມຸງຄຸນ ໃນການຮັບຮອງເອົາບ້ານໃຫ່ຍສົບເລົ້າ ເປັນສີສັນຕົວເມືອງນ້ອຍໃນຊົນນະບົດ. ເຂົ້າຮ່ວມພິທີດັ່ງກ່າວຍັງມີ ທ່ານ ຄຳວອນ ບຸນທະວົງ ສະມາຊິກສະພາແຫ່ງຊາດ-ປະທານສະພາຂັ້ນແຂວງ, ບັນດາທ່ານ ໃນຄະນະປະຈຳພັກ, ຫົວໜ້າ, ຮອງຫົວໜ້າ ພະແນກການກ່ຽວຂ້ອງອ້ອມຂ້າງແຂວງ, ການນໍາເມືອງຫົວເມືອງແຂກຖຶກເຊີນຈາກແຂວງຊຽງຂວາງ ແລະ ມວນຊົນພາຍໃນບ້ານ ,ບ້ານອ້ອມຂ້າງເຂົ້າຮ່ວມຢ່າງຄົບຄາໜາແໜ້ນ.
Editor: ນັກຂ່າວເມືອງຫົວເມືອງ
