ລະດູການທ່ອງທ່ຽວ 4000 ພັນຂຸມ ທີ່ບ້ານທ່າຄັນຊຸມຊົວ, ເມືອງລະຄອນເພັງ, ແຂວງສາລະວັນ ແມ່ນ ເລີ່ມ ແຕ່ເດືອນມັງກອນ ໄປຈົນເຖິງ ເດືອນພຶດສະພາ ຂອງທຸກໆປີ. ສະຖານທີ່ດັ່ງກ່າວ ແມ່ນຢູ່ຕາມລໍາແມ່ນໍ້າຂອງ ເຊິ່ງເກີດຈາກການກັດເຊາະຂອງແມ່ນໍ້າຂອງ ເຮັດໃຫ້ເກີດເປັນປະຕິມະກໍາ ທີ່ຫນ້າມະຫັດສະຈັນ. ບັນດາກ້ອນຫີນ ຂະຫນາດ ນ້ອຍ-ໃຫຍ່ ໄດ້ຖືກສາຍນໍ້າກັດເຊາະ ມາເປັນເວລາ ຫລາຍປີ ຈົນເຮັດໃຫ້ກາຍເປັນຮູບແບບຕ່າງໆ ທີ່ມີຄວາມສວຍງາມ ແລະ ແປກຕາ ກາຍເປັນຜົນງານຈາກທໍາມະຊາດ ທີ່ມີຄວາມສວຍງາມ ແລະ ຄວາມມະຫັດສະຈັນ.
4000 ຂຸມ ແມ່ນມີມາຫລາຍຮ້ອຍປີ ແຕ່ໄລຍະຜ່ານມາ ແມ່ນບໍ່ໄດ້ມີໃຜສົນໃຈ, ແຕ່ມາໃນໄລຍະ 10 ປີຫລັງມານີ້ ວຽກງານການທ່ອງທ່ຽວ ໄດ້ມີການເຕີບໃຫຍ່ຂື້ນເປັນກ້າວໆ ຈິ່ງໄດ້ກໍານົດເອົາຈຸດດັ່ງກ່າວ ເປັນອີກຫນຶ່ງແຫຼ່ງທ່ອງທ່ຽວ ທີ່ຫນ້າສົນໃຈ ພາຍໃນເມືອງລະຄອນເພັງ, ແຂວງສາລະວັນ. ເພື່ອເຮັດໃຫ້ແຫລ່ງທ່ອງທ່ຽວ ດັ່ງກ່າວ ກາຍເປັນທີ່ຮູ້ຈັກໃຫ້ກວ້າງຂວາງ ແລະ ດຶງດູດເອົານັກທ່ອງທ່ຽວ ທາງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ພາຍໃນເມືອງ ກໍ່ຄື ຖວທ ແຂວງ ໄດ້ເອົາໃຈໃສ່ ໂຄສະນາເຜີຍແຜ່ ເພື່ອເຮັດໃຫ້ນັກທ່ອງທ່ຽວ ຮູ້ຈັກກັນຫລາຍຂຶ້ນ ແລະ ພາກັນເດີນທາງມາຢ້ຽມຢາມສໍາຜັດດ້ວຍຕົວເອງ ເຖິງຄວາມສວຍງາມ ແລະ ຄວາມມະຫັດສະຈັນ ແບບທໍາມະຊາດສ້າງຂຶ້ນ, ເກີນຄໍາບັນຍາຍ.
ສໍາລັບ ເວລາທ່ອງທ່ຽວ ທີ່ເຫມາະສົມທີ່ສຸດ ຄື ໄລຍະເຊົ້າ ກ່ອນຕະເວັນຂຶ້ນ ແລະ ຕອນແລງໆ ເພື່ອຊົມຕະເວັນຕົກດິນ ເຊິ່ງເປັນໄລຍະ ທີ່ມີຄວາມສວຍງາມທີ່ສຸດ ກໍ່ວ່າໄດ້. ນອກຈາກນີ້, ຕາມຈຸດຕ່າງໆ ຍັງສາມາດເກັບພາບ ຫລື ຖ່າຍພາບ ເຖິງຄວາມສວຍງາມໄດ້ອີກ ເຊິ່ງທ່ານຈະບໍ່ຜິດຫວັງ ເມື່ອທ່ານ ໄດ້ມາສໍາຜັດດ້ວຍຕົວເອງ. ທ່ານ ສາມາດເດີນທາງມາໄດ້ທີ່ບ້ານທ່າຄັນຊູມຊົວ, ເມືອງລະຄອນເພັງ, ແຂວງສາລະວັນ ຫລື ສາມາດພົວພັນສອບຖາມໄປຍັງ ຫ້ອງການ ຖວທ ເມືອງ ຍິ່ງເປັນການດີ ເພື່ອໃຫ້ມີພະນັກງານ-ວິຊາການ ປະຈໍາທ້ອງຖິ່ນ ເປັນຜູ້ນໍາພາໄປຍິ່ງເປັນການດີ.

Editor: ດາວໄຊ ສີວິໄລ