ແຂວງຈໍາປາສັກ ດິນແດນທາງພາກໃຕ້ຂອງປະເທດລາວເຮົາ ທີ່ເເຕັມໄປດ້ວຍອະລິຍະທໍາ ອັນທີ່ເກົ່າແກ່ ທີ່ໜ້າຄົ້ນຫາ ແລະ ມີທຳມະຊາດທີ່ສວຍສົດງົດງາມຫຼາຍແຫ່ງທີ່ໜ້າຈັບຕາ ແລະ ເປັນດິນແດນທີ່ມີຄວາມຫຼາກຫຼາຍທາງດ້ານທຳມະຊາດ ມີທັງ ພູຜາ, ປ່າໄມ້ ແລະ ນໍ້າຕົກຕາດທີ່ມີສື່ສຽງ. ນອກນັ້ນຍັງມີຄວາມໂດດເດັ່ນທາງດ້ານວັດທະນະທຳ ແລະ ປະຫວັດສາດ. ສ່ວນການເດີນທາງເຂົ້າສູ່ແຂວງຈຳປາສັກ ແມ່ນເປັນເລື່ອງທີ່ງ່າຍທີ່ສຸດ ເພາະວ່າມີເສັ້ນທາງບົກ ເຊື່ອມຈອດ ຕິດກັບບັນດາແຂວງ ແລະ ປະເທດໃກ້ຄຽງ.
ເຊິ່ງມື້ນີ້ຈະພາບັນດາທ່ານມາຮູ້ຈັກກັບຕາດເຍືອງ, ຕາດເຍືອງ ເປັນຕາດ ສູງຊັນປະມານ 50 ແມັດ, ແບ່ງເປັນ 2 ຖ້ານ, ມີທາງລົງໄປດ້ານລຸ້ມຂອງຕາດ ຫຼື ວັງນໍ້າຕົກ, ຊຶ່ງກໍາເນີດຈາກສາຍນໍ້າຫ້ວຍບັງລຽງ ທີ່ຕັ້ງຢູ່ບ້ານຫຼັກ 40 ເມືອງປາກຊ່ອງ ແຂວງ ຈຳປາສັກ ຫ່າງຈາກບ້ານໄປທາງທິດຕາເວັນຕົກສ່ຽງໃຕ້ ປະມານ 1.3 ກິໂລແມັດ, ຫ່າງຈາກຕົວເມືອງປາກຊ່ອງ ປະມານ 1 ກິໂລແມັດ, ສາມາດນໍາໃຊ້ຍານພາຫະນະທຸກປະເພດເຂົ້າເຖິງສະຖານທີ່ຢ່າງສະດວກສະບາຍ, ຈຸດເດັ່ນແມ່ນນໍ້າຕົກຕາດສວຍງາມ ແລະ ສາມາດຫຼິ້ນນໍ້າທາງລຸ່ມໄດ້ ແລະ ເປັນສິ່ງດຶງດູດທັງເປັນເອກະລັກສະເພາະຂອງສະຖານທີ່ທ່ອງທ່ຽວຂອງຕາດເຍືອງ.
ການທີ່ໄດ້ຊື່ວ່າ ຕາດເຍືອງ ມີເລື່ອເລົ່າຢູ່ວ່າ ຜູ້ອາໃສຢູ່ຖິ່ນຖານແຫ່ງນີ້ ເຄີຍພົບເຫັນເຍືອງ 2 ໂຕ ອາໃສຢູ່ໃນຖໍ້າດ້ານລຸ່ມຕາດ ເພື່ອຄວາມຈື່ຈຳງ່າຍຈຶ່ງໃສ່ຊື່ຕາດນີ້ວ່າ: ຕາດເຍືອງ ມາເທົ່າທຸກວັນນີ້.
ນອກຈາກຕາດເຍືອງ ແລ້ວ ເມືອງປາກຊ່ອງ ຍັງມີຫຼາກຫຼາຍສະຖານທີ່ທ່ອງທ່ຽວ ບໍ່ວ່າຈະເປັນທໍາມະຊາດປາກພູໄຟ, ດ່ານສິນໄຊ, ພູເທວະດາ, ທ່ຽວຕາດ 7 ຊັ້ນ, ຕາດຕະເຍິກເສືອ, ຂີ່ສະລິງຊົມວິວ, ດື່ມກາເຟເຫີນເວຫາທີ່ຕາດຟານ, ຕາດອີ່ຕູ້, ຕາດຈໍາປີ ແລະ ທ່ຽວຊົມເບິ່ງທໍາມະຊາດສວນກາເຟ, ສວນສະຫະກອນກາເຟລາວ, ສວນຊາ, ສວນດອກໄມ້, ທ່ຽວພະຈົນໄພປີນຜາ ແລະ ຊົມເຮືອນເທິງຕົ້ນໄມ້ຢູ່ເຂດບ້ານໜອງຫຼວງ.
Editor: ເມືອງປາກຊ່ອງ
