ໃນວັນທີ່ 1 ມີນາ 2018 ຢູ່ຫ້ອງປະຊຸມຊັ້ນ III ຂອງຫ້ອງວ່າການປົກຄອງເມືອງ ວຽງທອງ, ແຂວງ ບໍລິຄໍາໄຊ ລັດວິສາຫະກິດໄຟຟ້າລາວ ສາຂາແຂວງບໍລິຄໍາໄຊ ລົງມາເຜີຍແຜ່ລະບຽບ, ຫຼັກການ, ວິທີການນໍາໃຊ້ ໄຟຟ້າຢ່າງປະຢັດຖືກຕ້ອງ ແລະ ມີຄວາມປອດໄພ ແລະ ຫຼັກການໄຟຟ້າແບບພື້ນຖານໂດຍປະຕິບັດຕາມ 3 ປໍ 1 ຖໍ ໃຫ້ພະນັກງານ-ລັດຖະກອນພາຍໃນເມືອງ ວຽງທອງ ໂດຍເປັນກຽດເຂົ້າຮ່ວມຂອງ ທ່ານ ວັນຄໍາ ເພັດໄຊຍະວົງ, ຄະນະປະຈໍາພັກເມືອງ, ປະທານກວດກາພັກ-ລັດເມືອງ, ທ່ານ ສຸກວິໄລ ສຸວັນນະເມທີ ຮອງຫົວນ້າລັດວິສາຫະກິດໄຟຟ້າລາວສາຂາແຂວງ ບໍລິຄໍາໄຊ, ມີພະນັກງານ-ລັດຖະກອນເຂົ້າຮ່ວມຟັງຢ່າງພ້ອມພຽງ.
ໃນພິທີ ທ່ານ ຄໍາເພັດ ວົງນະລາດ ຫົວໜ້າຈັດຕັ້ງລັດວິສາຫະກິດໄຟຟ້າລາວສາຂາແຂວງບໍລິຄໍາໄຊ ໄດ້ເປັນກຽດຂຶ້ນຜ່ານບັນດານິຕິກໍາຕ່າງໆກ່ຽວກັບໄຟຟ້າ ເປັນຕົ້ນກົດໝາຍບາງມາດຕາ, ດໍາລັດຂອງນາຍົກ, ແຈ້ງການ. ຈາກນັ້ນ ກໍ່ໄດ້ອະທິບາຍການນໍາໃຊ້ໄຟຟ້າຢ່າງມີປະສິດຕິພາບ ແລະ ປອດໄພ, ບັນດາຂໍ້ຫ້າມ ແລະ ຂໍ້ແນະນໍາກ່ຽວກັບການນາໃຊ້ໄຟຟ້າ, ແນະນໍາຫຼັກການປະຢັດໄຟຟ້າຂັ້ນພື້ນຖານ 3 ປໍ 1 ຖໍ ຄື: ປິດດອກໄຟທີ່ບໍ່ໃຊ້, ປ່ຽນມາໃຊດອກປະຢັດ, ປັບແອລະດັບ 25 ອົງສາ ແລະ ຖອດປັກສຽບຫຼັງເລີກໃຊ້ທຸກຄັ້ງ.
ພ້ອມດຽວກັນນັ້ນ ທາງລັດວິສາຫະກິດໄຟຟ້າ ກໍ່ເປີດໂອກາດໃຫ້ຜູ້ເຂົ້າຮ່ວມໄດ້ສອບຖາມຂໍ້ມູນຕ່າງໆກ່ຽວກັບໄຟຟ້າ ໂດຍສະເພາະກ່ຽວກັບການບໍລິການ, ການເວົ້າຈາຂອງພະນັກງານໃນເວລາປະຕິບັດວຽກງານ. ຈາກນັ້ນ ຕ່າງໜ້າລັດວິສາຫະກິດ ກໍ່ໄດ້ຂຶ້ນອະທິບາຍຊິແຈງຕໍ່ຄໍາຊັກຖາມຢ່າງກົງໄປກົງມາ ເພື່ອຄວາມເຂົ້າໃຈ ແລະ ເປັນເອກະພາບໃນການນໍາໃຊ້ໄຟຟ້າ.
Editor: ເມືອງວຽງທອງ
