ແຂວງອຸດົມໄຊ ທີ່ຕັ້ງຢູ່ທາງພາກເໜືອຂອງປະເທດລາວເຮົາ ທີ່ເຕັມໄປດ້ວຍອັນຍະມະນີໜ້າຄົ້ນຫາ ແລະ ມີທຳມະຊາດທີ່ສວຍສົດງົດງາຫຼາຍແຫ່ງ. ເມື່ອເວົ້າເຖິງສະຖານທີ່ທ່ອງທ່ຽວຢູ່ແຂວງອຸດົມໄຊແລ້ວ “ນໍ້າຕົກຕາດຕະແລ” ເປັນແຫຼງທ່ອງທ່ຽວທາງທໍາມະຊາດອີກແຫ່ງໜຶ່ງ ຢູ່ທີ່ເມືອງຮຸນ, ທີ່ມີຄວາມສວຍງາມຂອງນໍ້າຕົກຕາດ, ເປັນທີ່ຫລົງໄຫລຂອງນັກທ່ອງທ່ຽວ, ຕາດຕະແລ ຕັ້ງຢູ່ບ້ານຕະແລ, ຫ່າງຈາກເທດສະບານ ເມືອງຮຸນ ປະມານ 20 ກວ່າ ກິໂລແມັດ, ການເຂົ້າເຖິງເປັນເສັ້ນທາງດິນແດງ, ຈຸດເດັ່ນ ຂອງຕາດນີ້ ເປັນນ້ຳຕົກຕາດທີ່ມີຄວາມສວຍສົດງົດງາມ ທາງທຳມະຊາດ ເຊິ່ງອ້ອມຮອບດ້ວຍປ່າດົງດິບ ແລະ ປ່າເຄິ່ງດົງດິບ ທີ່ມີຕົ້ນໄມ້ໃຫຍ່, ນ້ອຍ ທີ່ມີໃບດົກ ໜາຂຽວງາມ ແລະ ເຕັມໄປດ້ວຍນົກນາໆຊະນິດ, ນ້ຳຕົກຕາດແຫ່ງນີ້ ມີທັງໝົດ 7 ຕາດດ້ວຍກັນ, ມີທັງຕາດໃຫຍ່, ຕາດນ້ອຍ ຢັ່ງຢາຍໄປຕາມສາຍນ້ຳຕະແລ ຍາວປະມານ 600 ກວ່າແມັດ ແລະ ນ້ຳຕົກຕາດຕະແລ ຍັງມີຕຳນານເລົ່າຂານປາກຕໍ່ປາກສືບຕໍ່ກັນມາວ່າ: ແຕ່ປາງກ່ອນ ມີບ່າວເງືອກຜູ້ໜຶ່ງຊື່ວ່າ ທ້າວ ພັກ ໄດ້ລົງໄປຫຼິ້ນບຸນ ຢູ່ຫຼວງພະບາງ, ໄປເຫັນສາວເງືອກ ຜູ້ໜຶ່ງຊື່ວ່າ ນາງ ຄຳຜິວ ທີ່ອາໄສຢູ່ນ້ຳຄານ. ທ້າວ ພັກ ເກີດມີຄວາມຮັກມັກກັບນາງ ຄຳຜີວ ແລະ ໄດ້ລັກເອົານາງ ຄຳຜິວ ມານຳ, ຕໍ່ຈາກນັ້ນມາ ມີບ່າວເງືອກຄົນໜຶ່ງ ທີ່ຢູ່ຫຼວງພະບາງ ທີ່ເຄີຍຮັກມັກກັບນາງ ຄຳຜິວ ມາກ່ອນໜ້ານີ້ ໄດ້ນຳມາເອົານາງ ຄຳຜິວ ຄືນ ແລະ ເກີດມີການຕໍ່ສູ້ກັນ, ສ່ວນທ້າວ ພັກ ກໍ່ໄດ້ສ້າງດ່ານຕ້ານ ກັນໄວ້ເປັນຈຸດໆ ຢູ່ທີ່ນ້ຳຕະແລ ແລະ ດ່ານ ດັ່ງກ່າວ ກໍ່ກາຍເປັນຕາດຕະແລໃນປະຈຸບັນ.
Editor: ແຂວງອຸດົມໄຊ
