ແຂວງອັດຕະປື ເປັນແຂວງທີ່ຕັ້ງຢູ່ທາງພາກໃຕ້ສຸດຂອງປະເທດລາວເຮົາ ປະຈຸບັນເປັນເຂດສາມຫລ່ຽມພັດທະນາເສດຖະກິດ ລະຫວ່າງ ລາວ-ຫວຽດນາມ-ກຳປູເຈຍ ຈະກາຍເປັນ ເຂດພັດທະນາ ສົ່ງເສີມ ການຄ້າ ແລະ ການທ່ອງທ່ຽວ ໃນອະນຸພາກພື້ນ ທີ່ຕິດພັນ ກັບ ທຳມະຊາດ ແລະ ວັດທະນະທຳ.
ແຂວງອັດຕະປື ເປັນອີກແຂວງໜຶ່ງ ທີ່ອຸດົມສົມບູນໄປດ້ວຍຊັບໃນດິນ ສິນໃນນໍ້າ ແລະ ເປັນດິນແດນທີ່ມີຄວາມຫຼາຫຼາຍທາງດ້ານທຳມະຊາດ ທັງພູຜາປ່າໄມ້ ແລະ ນໍ້າຕົກຕາດທີ່ມີຊື່ສຽງ. ນອກຈາກນັ້ນ ຍັງມີຄວາມໂດດເດັ່ນທາງດ້ານວັດທະນະທຳ ແລະ ປະຫວັດສາດ. ສ່ວນການເດີນທາງເຂົ້າສູ່ແຂວງອັດຕະປື ແມ່ນມີຄວາມສະດວກສະບາຍ ເພາະມີເສັ້ນທາງບົກເຊື່ອມຈອດກັບບັນດາແຂວງ ແລະ ປະເທດໃກ້ຄຽງ.
ເມື່ອເວົ້າເຖິງສະຖານທ່ອງທ່ຽວທີ່ຫນ້າສົນໃຈຂອງແຂວງແລ້ວ ບໍ່ວ່າຈະເປັນທາງດ້ານທຳມະຊາດ, ປະ ຫວັດສາດ ແລະ ວັດທະນະທໍາ. ສໍາລັບ ແຫລ່ງທ່ອງທ່ຽວທາງດ້ານທໍາມະຊາດ ພາຍໃນແຂວງ ເຊິ່ງມີຫລາຍແຫ່ງທີ່ຫນ້າສົນໃຈ ເປັນຕົ້ນແມ່ນ: ນໍ້າຕົກຕາດແຊພະ, ນໍ້າຕົກຕາດລະະມອງ, ນໍ້າຕົກຕາດສະໝອງພາກ, ນໍ້າຕົກຕາດແຊປ້ອງໄລ່, ປ່າສະຫງວນແຫ່ງຊາດເຊປ່ຽນ, ປ່າສະຫງວນແຫ່ງຊາດດົງອໍາພານ, ໜອງຟ້າ, ທົ່ງໄກ່ໂອກ ແລະ ອື່ນໆ. ສ່ວນແຫລ່ງທ່ອງທ່ຽວທາງດ້ານປະຫວັດສາດ ແລະ ວັດທະນະທຳ ແມ່ນ ມີ: ລູກສອນໄຟ, ເສັນທາງໂຮ່ຈີມິນ, ວັດພຣະເຈົ້າໄຊຍະເຊດຖາ, ວັດພຣະອົງແສນສຸຂະຣາມ, ວັດສະແຄະສຸຂະລາມ, ເຜົ່າເບົາ, ເຜົ່າຕະຫຼ່ຽງ ແລະ ຫັດຖະກໍາຕໍ່າແພ, ເຜົ່າເໂອຍ ແລະ ຫັດຖະກໍາເຄື່ອງປັ້ນດິນເຜົາ. ນອກຈາກນີ້ ຍັງງານບຸນປະເພນີວັດທະນະທໍາບັນດາເຜົ່າ. ເຊິ່ງໄດ້ຈັດຂຶ້ນໃນທຸກໆປີ ເພື່ອສົ່ງເສີມການທ່ອງທ່ຽວ ແລະ ເພື່ອຮັກສາຮີດຄອງປະເພນີວັດທະນະທຳ.
ສະນັ້ນ ປີທ່ອງທ່ຽວລາວ 2018 ນີ້ ຈຶ່ງຖືເອົາໂອກາດນີ້ ໃຫ້ບັນດາທ່ານ ລວມໄປເຖິງນັກທ່ອງທ່ຽວ ທັງພາຍໃນ ແລະ ຕ່າງປະເທດ ຫາໂອກາດໄປສໍາຜັດດ້ວຍຕາຂອງທ່ານເອງ.

Editor: ແຂວງອັດຕະປື