ເມື່ອບໍ່ດົນມານີ້ ຢູ່ທີ່ເມືອງຄໍາ ຄະນະບໍລິຫານງານພັກເມືອງ ໄດ້ຈັດພິທີສະເຫຼີມສະຫຼອງປີທ່ອງທ່ຽວລາວ 2018 ແລະ ງານສະແດງຂາຍສີນຄ້າກະສິກຳ, ຫັດຖະກຳ ຂື້ນທີ່ຄິວລົດເມ ເມືອງຄຳ ແຂວງຊຽງຂວາງ ຢ່າງເປັນທາງການ. ໂດຍພາຍໃຕ້ການຊີ້ນຳນຳພາຂອງ ທ່ານ ມີໄຊ ແພງສາ ຮອງເລຂາພັກເມືອງ ຮອງເຈົ້າເມືອງ-ເມືອງຄຳ, ມີ ທ່ານນາງ ບຸນມີ ສົມພັນສຸກ ຄະນະປະຈຳພັກເມືອງ, ມີຫົວໜ້າຫ້ອງການ, ຮອງຫົວໜ້າຫ້ອງການ, ແຂກຖືກເຊີນບັນດາເມືອງອ້ອມຂ້າງພ້ອມດ້ວຍພະນັກງານລັດຖະກອນຫຼັກແຫຼ່ງເຂົ້າຮ່ວມ.
ຈຸດປະສົງກໍ່ເພື່ອເປັນການຂ່ຳນັບຮັບຕ້ອນປີທ່ອງທ່ຽວລາວ 2018 ໃຫ້ມີບັນຍາກາດຟົດຟື້ນພ້ອມທັງເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ ພ້ອມນີ້ກໍ່ຍັງເປັນການຊຸກຍູ້ສົ່ງເສີມການປູກຝັງລ້ຽງສັດ, ຫັດຖະກຳຕ່ຳຫູກ-ທໍ່ໄໝ ທີ່ເປັນເອກະລັກຂອງປະຊາຊົນບັນດາເຜົ່າ ກໍ່ຄືການຮັກສາຮີດຄອງປະເພນີອັນດີງາມຂອງຊາດທີ່ໄດ້ສືບທອດກັນມາແຕ່ຍາວນານ. ເນື່ອງໃນໂອ້ກາດດັ່ງກ່າວ ທ່ານ ມີໄຊ ແພງສາ ຮອງເລຂາພັກເມືອງຮອເຈົ້າເມືອງ-ເມືອງຄຳ ກໍ່ໄດ້ ຂື້ນກ່າວເປີດພິທີໃຫ້ຮູ້ວ່າ: ໃນທ່າມກາງບັນຍາກາດທົ່ວພັກທົ່ວປວງຊົນ ຊາວເມືອງຄຳພວມເບີກບານມ່ວນຊື່ນໃນການຈັດຕັ້ງປະຕິບັດມະຕິກອງປະຊຸມໃຫຍ່ສະໄໝ່ທີ 9 ຂອງອົງຄະນະພັກເມືອງ ແລະ ແຜນພັດທະນາເສດຖະກິດ-ສັງຄົມ ຂອງເມືອງຢ່າງເປັນຂະບວນ, ພ້ອມນັ້ນ, ກໍ່ຍັງໃຫ້ຮູ້ເຖິງພາລະບົດບາດທີ່ສຳຄັນຂອງການທ່ອງທ່ຽວ ໃນການພັດທະນາເສດຖະກິດ-ສັງຄົມຂອງແຂວງ, ຂອງເມືອງ ທີ່ຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າ, ມີບົດບາດປັບປຸງແຫຼ່ງທ່ອງທ່ຽວທຳມະຊາດ, ປະຫວັດສາດ ແລະ ວັດທະນະທຳ ຕະຫຼອດເຖິງການປັບປຸງພື້ນຖານໂຄງລ່າງໃຫ້ດີຂື້ນ, ມີຄວາມສະອາດສວຍງາມເຮັດ ໃຫ້ການທ່ອງທ່ຽວມີຄວາມສຳຄັນຕໍ່ກັບການສົ່ງເສີມການຜະລິດ, ການອະນຸລັກຮັກສາຮີດຄອງປະເພນີອັນດີງາມ ທີ່ເປັນເອກະລັກຂອງທ້ອງຖີ່ນ, ການສະເຫຼີມສະຫຼອງປີທ່ອງທ່ຽວລາວ 2018 ໃນຄັ້ງນີ້ ຍັງໄດ້ສ້າງກິດຈະກຳຕ່າງໆເຊັ່ນ: ການວາງຂາຍຜະລິດຕະພັນໂອອ໋ອບ ຫລື ສີນຄ້າໜຶ່ງເມືອງໜຶ່ງຜະລິດຕະພັນ, ການແຂ່ງຂັນສີລະປະ-ວັນນະຄະດີ ແລະ ແຂ່ງຂັນກິລາເປຕັງ ຍິງ-ຊາຍ. ແລະ ພ້ອມດຽວກັນນັ້ນ ກໍ່ຍັງໄດ້ກ່າວເປີດພິທີຢ່າງເປັນທາງການ. ພິທີສະເຫຼີມສະຫຼອງປີທ່ອງທ່ຽວ ທີ່ເມືອງຄໍາ ໄດ້ຈັດຂື້ນເປັນເວລາ 3 ວັນ ຈີ່ງໄດ້ສຳເລັດ ລົງດ້ວຍຜົນສໍາເລັດທີ່ດີງາມ.
ຂອບໃຈ ທີມຂ່າວ ເມືອງຄໍາ
Editor: ກຳປານາດ ລັດຖະເຮົ້າ
