ມາສັງເກດແລ້ວວ່າ ໃນແຕ່ລະມື້ ບໍລິເວນຫາດຊາຍ ດອນຈັນ ແຄມນໍ້າຂອງ ຈະມີມວນຊົນ ພາກັນລົງມາຫລີ້ນ, ຖ່າຍຮູບ, ຫລີ້ນນໍ້າ ແລະ ຈັດກິດຈະກໍາ ທີ່ສໍາຄັນ ເປັນຈໍານວນຫລວງຫລາຍ. ເພາະມີນໍ້າຂອງທີ່ໃສ-ໄຫລເຢັນ, ພ້ອມກັນນັ້ນ ຍັງມີຫາດຊາຍ ທີ່ສວຍງາມ, ທິວທັດທໍາມະຊາດສວຍງາມ ພ້ອມທັງເບີ່ງຕາເວັນລັບຂອບຟ້າ ເຊີ່ງເປັນອີກສະເໜ່ ທີ່ຫາໄດ້ ບໍ່ໄກ ຈາກນະຄອນຫລວງວຽງຈັນ. ຫາດຊາຍດອນຈັນ ເລີ່ມປະກົດໃຫ້ເຫັນ ພາຍຫລັງລະດູນໍ້າບົກແຫ້ງ ຫລື ກາງເດືອນທັນວາ ເປັນຕົ້ນມາ ແລະ ມີຄວາມສວຍງາມຫລາຍທີ່ສຸດ ຄືໄລຍະ ເດືອນ ມີນາ- ພຶດສະພາ ເຊີ່ງເປັນໄລຍະ ທີ່ຫາດຊາຍສວຍງາມ, ນໍ້າຂອງໄສ ໄຫລເຢັນ, ພ້ອມທັງວິວທິວທັດຍາມແລງ ທີ່ຫນ້າສົນໃຈ. ນອກຈາກນັ້ນ ຫາດຊາຍດອນຈັນ ຍັງຖືໄດ້ວ່າເປັນອີກຫນຶ່ງຫາດຊາຍ ທີ່ມີຄວາມສວຍງາມ ໃນລະດັບອາຊຽນ, ມີເນື້ອທີ່ກວມເອົສຫລາຍເຮັກຕາ ທອດຍາວ ມີເມັດຊາຍສວຍງາມ. ເຊີ່ງເກີດມາຈາກການພັດພາມາຂອງແມ່ນໍ້ຂອງ. ແມ່ນໍ້າຂອງ ຍັງຖືວ່າເປັນແມ່ນໍ້າທີ່ມີຄວາມສໍາຄັນ ຫລາຍທີ່ສຸດ, ໃນການດໍາລົງຊີວິດ ຂອງປະຊາຊົນ ໃນລຸ່ມແມ່ນໍ້າຂອງ ໃນນັ້ນ ສປປ ລາວ ແມ່ນມີນໍ້າຂອງໄຫລຜ່ານທອດຍາວ ແຕ່ເຫນືອ ຮອດໄຕ້ ເປັນເຫມືອນສາຍເລືອດໃຫຍ່ ທີ່ລໍ່ລ້ຽງຊີວິດຂອງຄົນເຮົາ ແລະ ຕິດພັນກັບວຽກງານອື່ນໆ ເຊັ່ນ: ການຄົມະນາຄົມ, ການກະສິກໍາ, ພະລັງງານ ແລະ ການທ່ອງທ່ຽວ.

ສະເພາະຫາດຊາຍດອນຈັນ ແລະ ບໍລິເວນ ທ່ານໍ້າແຄມຂອງ ໃນແຕ່ລະວັນ ມີມວນຊົນລົງໄປ ຫລີ້ນ ແລະ ສ້າງກິດຈະກໍາ ທີ່ຫນ້າສົນໃຈ ຫລາຍຢ່າງ ເຊັ່ນ: ການຫລີ້ນແຈັສກີ....ເຊີ່ງເປັນອີກຫນຶ່ງກິລາ ທີ່ກໍາລັງໄດ້ຮັບຄວາມນິຍົມ ແລະ ສະຖານທີ່ບໍລິເວນນໍ້າຂອງ ແມ່ນເປັນອີກທ່ານໍ້າ ທີ່ມີຄວາມເຫມາະສົມ, ກວ້າງຂວາງ, ພ້ອມມີວິວທິວທັດ ທີ່ສວຍງາມ. ນອກຈາກນັ້ນ ເພື່ອກຽມໃສ່ກັບງານສະເຫລີມສະຫລອງບຸນປີໃຫມ່ຂອງລາວ ທີ່ຍັບຫມໍ່ໃກ້ເຂົ້າມາ ຫລາຍພາກສ່ວນ ໄດ້ສຸມໃສ່ພັດທະນາ ບໍລິເວນແຄມຂອງ ເພື່ອສ້າງສີສັນແຫ່ງການທ່ອງທ່ຽວ ໃຫ້ມີຄວາມຄຶກຄື້ນ, ພ້ອມທັງນໍາເອົາກິດຈະກໍາຕ່າງໆ ທີ່ຫນ້າສົນໃຈ ລົງໄປທີ່ຫາດຊາຍ ເພື່ອເປັນອີກຫນຶ່ງແຮງດຶງດູດເອົານັກທ່ອງທ່ຽວ ໃຫ້ຫັນລົງໄປທ່ອງທ່ຽວ ສະຖານທີ່ດັ່ງກ່າວ ນັບມື້ ນັບຫລາຍຂື້ນ

Editor: ກຳປານາດ ລັດຖະເຮົ້າ