ຕາດແຫ່ງນີ້, ແມ່ນມີເອກະລັກພິເສດ ແລະ ມີຄວາມໂດດເດັ່ນ ເຊີ່ງມີນໍ້າຕົກລົງຈາກຫນ້າຝາສູງ ປະມານ 70 ກວ່າແມັດ. ເປັນສາຍນໍ້າຄູ່ຂະຫນານ. ມີທິວທັດທໍາມະຊາດ ທີ່ສວຍງາມ ໂດຍອ້ອມຮອບດ້ວຍປ່າໄມ້ສີຂຽວ ທີ່ອຸດົມສົມບູນຫລາຍທີ່ສຸດ.

ຕາດນໍ້າສະຫມານ ຕັ້ງຢູ່ໃນເຂດປ່າສະຫງວນ ໃນເມືອງຄູນຄໍາ, ແຂວງຄໍາມ່ວນ, ການເດີນທາງເຂົ້າໄປຫາ ນໍ້າຕົກຕາດ ແມ່ນສາມາດຍ່າງເຂົ້າໄປໃນປ່າ ໃຊ້ເວລາ ປະມານ 40-60 ນາທີ. ຜ່ານປ່າອັນອຸດົມສົມບູນ ທີ່ເຕັມໄປດ້ວຍປ່າໄມ້ ຕົ້ນໄມ້ໃຫຍ່, ໄມ້ນ້ອຍ ທີ່ຫາຍາກ ແລະ ນອນຢູ່ໃນບັນຊີໄມ້ຫວງຫ້າມ, ພ້ອມກັນນັນ ເວລາເດີນທາງເຂົ້າໄປ ຫາຕາດດັ່ງກ່າວ ສິ່ງທີ່ນັກທ່ອງທ່ຽວຈະໄດ້ສໍາຜັດ ກໍ່ຄື ຄວາມເປັນທໍາມະຊາດ, ຄວາມເປັນປ່າໄມ້ ທີ່ມີຊີວະນານາພັນ ອັນສົມບູນ, ດ້ວຍປ່າໄມ້ ແລະ ສັດປ່າບາງຊະນິດ. ເປັນຕົ້ນ ນົກ. ຫນູ. ກະຮອກ, ກະແຕ ແລະ ສິງ ຫລື ສຽງສະນີຮ້ອງ, ສຽງນົກກົກ ຫລື ນົກເງືອກ ເຊີ່ງຫາເບີ່ງ ຫາຟັງ ໄດ້ຍາກ.
ໄລຍະທາງ ເຂົ້າໄປ ຈາກຫໍຂໍ້ມູນຂ່າວສນການທ່ອງທ່ຽວ ຫານໍ້າຕົກຕາດ ປະມານ 4-5 ກິໂລແມັດ ຖືວ່າເປັນປະສົບການທີ່ທ້າທາຍ ແລະ ຫາຍາກທີ່ຈະໄດ້ພົບເຫັນພາບແບບນີ້, ເມື່ອເຂົ້າໄປຮອດຕາດ ນັກທ່ອງທ່ຽວສ່ວນໃຫຍ່ ຈະມີຄວາມປະທັບໃຈ ເປັນພິເສດ ສົມກັບຄວາມອົດທົນ ໃນການເດີນທາງ. ເພາະຕາດນໍ້າສະຫນາມ ແມ່ນມີຄວາມສວຍງາມ ເປັນເອກະລັກ, ເປັນນໍ້າຕົກຄູ່ຂະຫນານ ຄ້າຍຄືກັບຕາດຟານ ທີ່ເມືອງປາກຊ່ອງ, ແຂວງຈໍາປາສັກ.

ຕາດນໍ້າສະຫມານ ສາມາດລົງຫລີ້ນນໍາໄດ້ ແຕ່ຕ້ອງມີຄວາມລະມັດ-ລະວັງ ໂດຍໄດ້ຮັບຄໍາອະທິບາຍຈາກພະນັກງານ ສູນຂ່າວການທ່ອງທ່ຽວ ປະຈໍາເມືອງ. ເຊີ່ງນັກທ່ອງທ່ຽວທີ່ເດີນທາງເຂົ້າໄປ ໃນທຸກຄັ້ງແມ່ນຈະມີພະນັກງານນໍາທ່ຽວພາຍໃນສູນຂ່າວ ຕິດຕາມໄປພ້ອມ ເພື່ອໃຫ້ຄໍາແນະນໍາ ການນໍາທາງ ເພື່ອບໍ່ໃຫ້ຫລົງທາງ ເພາະ ເປັນປ່າທີ່ມີຄວາມອຸດົມສົມບູນ ແລະ ຍັງປ້ອງກັນການພັດຫລົງໄດ້. ຕາດນໍ້າສະຫມານ ສາມາດເດິນທາງເຂົ້າໄປທ່ຽວຊົມ ໄດ້ຕະຫລາດປີ, ລະດູຝົນ ນໍ້າອາດຈະຫລາຍ ແຕ່ສໍາລັບລະດູແລ້ງ ກໍ່ຍັງສາມາດທ່ຽວຊົມໄດ້ເຊັ່ນດຽວກັນ. (ກໍາປານາດ ລັດຖະເຮົ້າ)

Editor: ກຳປານາດ ລັດຖະເຮົ້າ