ໃນວັນທີ 18 ເມສາ 2018 ນີ້, ທີມງານນາງສາວນະຄອນຫລວງວຽງຈັນ 2018 ໄດ້ເດີນທາງໄປຢ້ຽມຢາມສະຖານທີທ່ອງທ່ຽວ ສວນພຶກສາ ເມືອງນາຊາຍທອງ, ນະຄອນຫລວງວຽງຈັນ ໂດຍການຕ້ອນຮັບ ຂອງທ່ານ ພູວົງ ພະມິສິດ ເຈົ້າຂອງແຫລ່ງທ່ອງທ່ຽວສວນພຶກສາ ( ທັງເປັນປະທານຮ້ານຄໍາພູວົງ ຜູ້ໃຫ້ການສະຫນັບສະຫນູນ ໂຄງການປະກວດນາງສາວນະຄອນຫລວງ ໂດຍດີຕະຫລອດມາ) ນໍໍທີມໂດຍ ນາງ ນິສຸດາ ວົງປະເສີດ ນາງສາວນະຄອນຫລວງວຽງຈັນ 2018 ພ້ິອມດ້ວຍນາງສາວ ຮອງອັນດັບ1, ຮອງອັນດັບ 2 ແລະ ຮອງອັນດັບ 3 ຕາມລໍາດັບ. ການລົງຢ້ຽມຢາມສວນພຶກສາ ຄັ້ງນີ້ ເພື່ອເປັນການຂອບໃຈ ແກ່ຜູ້ໃຫ້ການອຸປະຖໍາ ແລະ ສະຫນັບສະຫນູນ ໂຄງການປະກວດນາງສາວນະຄອນຫລວງວຽງຈັນ, ເຊີ່ງ ຮ້ານຄໍາພູວົງ ແມ່ນອີກພາກສ່ວນຫນຶ່ງ ທີ່ໄດ້ໃຫ້ການສະຫນັບສະຫນູນ ແກ່ສັງຄົມ, ຊ່ວຍເຫລືອສັງຄົມ ແລະ ໂຄງການອື່ນໆ ຢ່າງຫລວງຫລາຍ. ພ້ອມກັນນັ້ນ ຍັງເປັນການປະໂມດໂຄສະນາສະຖານທີ່ທ່ອງທ່ຽວ ສວນພຶກສາ ຕື່ມອີກ,
ແຫລ່ງທ່ອງທ່ຽວສວນພຶກສາ ເປັນອີກສະຖານທີ່ທ່ອງທ່ຽວ ໃນນະຄອນຫລວງວຽງຈັນ ເກີດຂື້ນໃຫມ່ ໃນໄລຍະ 2-3 ປີມານີ້, ແລະ ເປັນສະຖານທີ່ ມວນຊົນໄດ້ໃຫ້ຄວາມສົນໃຈ ເດີນທາງມາຢ້ຽມຢາມ ແລະ ທ່່ຽວຊົມ ເປັນຈໍານວນຫລວງຫລາຍ ບໍ່ໄດ້ຂາດສາຍ ໃນແຕ່ລະວັນ, ພາຍໃນສວນ ປະກອບດ້ວຍສິ່ງທີ່ສວຍງາມ ແລະ ມີສະເຫນ່ສະເພາະ. ເຊັ່ນ: ມີໄດໂນເສົາ ຂະຫນາດໃຫຍ່ 2 ໂຕ ທາງດ້ານຫນ້າທາງເຂົ້າ ຖືວ່າເປັນໄຮໄລ ກໍ່ວ່າໄດ້. ພ້ອມນັ້ນ ຍັງມີຮ້ານອາຫານ, ທີ່ເປັນຕູບ, ໄວ້ສໍາລັບນັ່ງພັກຜ່ອນ ແລະ ຮັບປະທານອາຫານ, ມີສະຖານທີ່ຖ່າຍຮູບໃນຫລາຍຈຸດ ທີ່ຫນ້າສົນໃຈ ແລະ ຂໍ້ຄວາມທີ່ສົນໃຈ, ມີສວນດອກໄມ້, ທີ່ສວຍງາມພຶກສານາໆພັນ, ນອກຈາກນີ້ ສວນພຶກສາ ຍັງໄດ້ນໍາເອົາກິດຈະກໍາໃຫມ່ໆເຂົ້າມາ ເພື່ອເພີ່ມຄວາມຫລາກຫລາຍແກ່ນັກທ່ອງທ່ຽວ ສ້າງສີສັນໃຫ້ສະຖານທີ່ທ່ອງທ່ຽວແຫ່ງນີ້ ເປັນທີ່ຫນ້າສົນໃຈ ຂອງນັກທ່ອງທ່ຽວຫລາຍຂື້ນ ເປັນຕົ້ນແມ່ນ ສະໄລເດີ ສໍາລັບການຫລີ້ນນໍາເດັກນ້ອຍ, ໂຫນສະລີງ ເທີງຕົ້ນໄມ້, ການຂີ່ຖີບ, ຂີ່ລົດເອທີວີ ແບບພະຈົນໄປ ແລະ ກິດຈະກໍາອື່ນໆ
ໂອກາດເດີນທາງມາຢ້ຽມຢາມສວນພຶກສາ ຄັ້ງນີ້ ບັນດານາງສາວ ນະຄອນຫລວງ ໄດ້ພາກັນເລາະຖ່າຍຮູບ ໃນແຕ່ລະຈຸດ ພ້ອມທັງຮ່ວມຖ່າຍຮູບກດັບນັກທ່ອງທ່ຽວ ທີ່ເດີນທາງມາທ່ຽວທ່ຽວ ສວນພຶກສາແຫ່ງນີ້. ຕໍ່ກັບການເດີນທາງມາຢ້ຽມຢາມ ສະຖານທີ່ສວນພຶກສາ ບັນດານາງສາວ ຍັງໄດ້ຮ່ວມພິທີບາສີສູ່ຂວັນ ທີ່ສວນພຶກສາຕື່ມອີກ. ພ້ອມກັນນີ້ ທ່ານ ພູວົງ ພະມິສິດ ເຈົ້າຂອງສວນພຶກສາ ໄດ້ສະແດງຄໍາຂອບອົກ-ຂອບໃຈ ຕໍ່ບັນດານາງສາວນະຄອນຫລວງ ແລະ ຄະນະ ທີ່ໄດ້ເດີນທາງມາຢ້ຽມຢາມ ແລະ ທ່ຽວຊົມສະຖານທີ່ແຫ່ງນີ້ ຢ່າງສຸດຊື້ງ, ພ້ອມກັນນັ້ນ ທ່ານ ຍັງໄດ້ຝາກເຊີນຊວນ ບັນດານັກທ່ອງທ່ຽວ ໃນນະຄອນຫລວງວຽງຈັນ ແລະ ຕ່າງແຂວງ ໃຫ້ມາທ່ຽວສວນພຶກສາໃຫ້ຫລາຍໆ ເປັນການສົ່ງເສີມການທ່ອງທ່ຽວລາວ 2018 ອີກດ້ວຍ.
Editor: ກຳປານາດ ລັດຖະເຮົ້າ
