ບ້ານນາດ້ວງ, ເມືອງວັງວຽງ ເປັນຫມູ່ບ້ານໂຮມສະເຕ ທີ່ມີຊື່ສຽງ ຂອງປະເທດ, ກໍ່ຄືໃນລະດັບອາຊຽນ ທີ່ຕິດກັບການທ່ອງທ່ຽວ ວິຖິຊີວິດ-ວັດທະນະທໍາ ແລະ ທໍາມະຊາດ. ສໍາລັບແຫລ່ງທ່ອງທ່ຽວທາງທໍາມະຊາດ ແມ່ນແກ້ງຍຸຍ ເປັນນໍ້າຕົກຂະຫນາດນ້ອຍ ແຕ່ອ້ອມຮອບ ຍັງມີບັນດາກິດຈະກໍາຕ່າງໆ ທີ່ຕິດພັນກັບການທ່ອງທ່ຽວ ເຊັ່ນວ່າ: ການຍ່າງປ່າຊົມທໍາມະຊາດ, ການຂີ່ລົດຖິບ, ການໂຫນສະລີງ ແລະ ການທັດສະນະສຶກສາພັນໄມ້ ຕ່າງໆ. ເຊີ່ງກິດຈະກໍາພາຍໃນບ້ານາດ້ວງ ກວມເອົາ 2 ມື້ 1 ຄືນ.
ຕາດແກ້ງຍຸຍ ຫ່າງຈາກບ້ານນາດ້ວງ ບໍ່ໄກປານໃດ, ການເດີນທາງສະດວກສະບາຍ, ສາມດເດີນທາງແບບຄະນະກໍ່ໄດ້ ຫລື ແບບສ່ວນໂຕກໍ່ໄດ້, ມີສາຍນໍ້າໄສໄຫລເຢັນ ສາມາດລົງອາບນໍ້າໄດ້ ໃນຈຸດຕ່າງໆ ພ້ອມກັນນັ້ນ, ນັກທ່ອງທ່ຽວທີ່ເດີນທາງ ຍັງສາມາດສືກສາເບີ່ງພັນໄມ້ ທີ່ຫາຍາກ ຖືວ່າຍັງມີຄວາມອຸດົມສົມບູນ ທີ່ຖືກປົກປັກຮັກສາໄວ້, ອີກກິດຈະກໍາທີ່ຫນ້າສົນໃຈ ຄືການໂຫນສະລີ່ງ ເຊີ່ງເປັນກິດຈະກໍາ ທ້າທາຍ ແລະ ນັກທ່ອງທ່ຽວກໍ່ໃຫ້ຄວາມສົນໃຈຫລາຍ ທັງນັກທ່ອງທ່ຽວ ຄົນລາວ ແລະ ຕ່າງປະເທດ.
ການທ່ອງທ່ຽວພາຍໃນບ້ານນາດ້ວງ ແມ່ນເປັນການທ່ອງທ່ຽວແບບອະນຸລັກ ທີ່ປະຊາຊົນມີສ່ວນຮ່ວມ ເພື່ອໃຫ້ເກີດຄວາມສົມດຸນ ແລະ ສ້າງລາຍຮັບແກ່ປະຊາຊົນ, ປະຊາຊົນພາຍໃນບ້ານເປັນເຈົ້າການໃນການອະນຸລັກວັດທະນະທໍາ ແລະ ການປົກປັກຮັກສາສິ່ງແວດລ້ອມ. ກໍ່ຄືທໍາມະຊາດ
Editor: ກຳປານາດ ລັດຖະເຮົ້າ
