ແຂວງອຸດົມໄຊ ຖືໄດ້ວ່າ ເປັນແຂວງທີ່ຕັ້ງຢູ່ໃຈກາງຂອງພາກເຫນື່ອ, ເປັນແຂວງທີ່ສາມາດເຊື່ອມຕໍ່ໄປຍັງບັນດາແຂວງອື່ນໆ ທາງພາກເຫນືອ ແລະ ພາກກາງ ຂອງ ສປປ ລາວ, ເປັນເສັ້ນທາງທີ່ສາມາດເຊື່ອງໂຍງທາງດ້ານການທ່ອງທ່ຽວເປັນຢ່າງດີ. ໃນນັ້ນ ແຂວງອຸດົມໄຊ ກໍ່ຍັງມີສະຖານທີ່ທ່ອງທ່ຽວທີ່ຫນ້າສົນໃຈຫລາຍບ່ອນ, ນັບທັງແຫລ່ງທ່ອງທ່ຽວທາງທຳມະຊາດ, ປະຫວັດສາດ ແລະ ວັດທະນະທຳອັນດີງາມຂອງຊົນເຜົ່າຕ່າງໆ. ອັນໂດດເດັ່ນ ແລະ ມີຊື່ສຽງ ພາຍໃນແຂວງ ເປັນຕົ້ນແມ່ນ ພະທາດໄຊມຸງຄຸນ ຣັດຕະນະມິ່ງເມືອງ, ເຊິ່ງເປັນສະຖານທີສັກສິດ ແລະ ເປັນສະຖານທີ່ເຄົາລົບຂາບໄຫວ ຂອງປວງຊົນ ຊາວແຂວງອຸດົມໄຊ, ທາງດ້ານວັດທະນະທຳຊົນເຜົ່າ ກໍ່ມີຄວາມຫລາກຫລາຍ, ຄວາມເປັນເອກະລັກ ວິຖີຊີວິດ, ການທຳມາຫາກິນ ແລະ ອື່ນ, ນອກນີ້, ແຂວງອຸດົມໄຊ ຍັງມີຄວາມອຸດົມສົມບູນທາງດ້ານທຳມະຊາດ ທີ່ຂຽວງາມ, ມີແຫລ່ງທ່ອງທ່ຽວທາງທຳມະຊາດ, ເປັນຕົ້ນແມ່ນ ປ່າສະຫງວນແຫ່ງຊາດ ນ້ຳກັດ, ເຊິ່ງໃນເຂດປ່າສະຫງວນນ້ຳກັດ ຍັງມີນ້ຳຕົກຕາດທີ່ມີຄວາມສວຍງາມ ນັ້ນກໍ່ແມ່ນຕາດນ້ຳກັດ ທີ່ມີຊື່ສຽງໃນແຂວງອຸດົມໄຊ.

ປ່າສະຫງວນແຫ່ງຊາດນ້ຳກັດ ແລະ ຕາດນ້ຳກັດ ມາໃນປະຈຸບັນແມ່ນໄດ້ຮັບການສຳປະທານຈາກພາກສ່ວນເອກະຊົນ ໃນການພັດທະນາໃຫ້ກາຍເປັນແຫລ່ງທ່ອງທ່ຽວ ທາງດ້ານທຳມະຊາດ, ຕິດພັນກັບການອະນຸລັກທຳມະຊາດ ແລະ ຊີວະນານາພັນ, ລວມໄປເຖິງວິຖີຊີວິດຂອງຊົນເຜົ່າ ທີ່ນອນຢູ່ໃນຂົງເຂດປ່າສະຫງວນ ໃນການໄດ້ມີສ່ວນຮ່ວມອັນສຳຄັນ ໃນການປົກປັກຮັກສາປ່າໄມ້ ແລະ ທຳມະຊາດ ໃຫ້ຍາວນານ. ເຊິ່ງມາໃນປະຈຸບັນ ສະຖານທີ່ດັ່ງກ່າວ ໄດ້ໃສ່ຊື່ວ່າ: ນ້ຳກັດໂຢລະປາ . ມາໃນປະຈຸບັນ ສະຖານທີ່ທ່ອງທ່ຽວທາງທຳມະຊາດແຫ່ງນີ້, ໄດ້ປະກອບໄດ້ດ້ວຍຫລາຍກິດຈະກຳ ເປັນເປັນການສ້າງແຮງຈຸງໃຈ ໃຫ້ນັກທ່ອງທ່ຽວເດີນທາງມາ ນັບມື້ນັບຫລາຍຂື້ນ ພາກສ່ວນຮັບຜິດຊອບ ຈິດໄດ້ມີຫລາຍກິດຈະກຳ ເພື່ອຮອງຮັບໃຫ້ແກ່ນັກທ່ອງທ່ຽວ ເປັນຕົ້ນແມ່ນ: ກິດຈະກຳຂີ່ຊ້າງ, ຂີ່ລົດຖີບ, ທ່ຽວຊົມທຳມະຊາດ ແລະ ຊີວະນານາພັນ, ທ່ຽວຊົມບ້ານຊົນເຜົ່າ ແລະ ວິຖີການດຳລົງຊີວິດ ແບບດັ່ງເດີມ, ການຍ່າງປ່າ, ຂົວອູ່, ທ່ຽວຊົມນ້ຳຕົກຕາດນ້ຳກັດ, ການໂຫນສະລິງ, ການປິນຫນ້າຜາ, ການນອນຢູ່ເທິງເຮືອນຕົ້ນໄມ້ ແລະ ກິດຈະກຳອື່ນໆຢ່າງຫລວງຫລາຍ, ນັກທ່ອງທ່ຽວສາມາດໄປສຳຜັດທ່ຽວຊົມ ຄວາມສວຍງາມຂອງທຳມະຊາດ, ພູຜ່າປ່າໄມ້, ອາກາດບໍລິສຸດ, ຊຸມເຢັນດ້ວຍສາຍນ້ຳກັດ ແລະ ວິຖີຊິວິດຂອງຊົນເຜົ່າຕ່າງໆທີ່ດຳລົງຊິວິດອ້ອມແອ້ມ, ສະຖານທີ່ດັ່ງກ່າວ. ເຊິ່ງຕັ້ງຫ່າງຈາກເທດສະບານແຂວງອຸດົມໄຊ ປະມານ 19 ກີໂລແມັດ ເທົ່ານັ້ນ.

Editor: ກຳປານາດ ລັດຖະເຮົ້າ