ໜອງຟ້າ ຕັ້ງຢູ່ບ້ານວັງຕັດ ເມືອງຊານໄຊ ຫ່າງຈາກຕົວເມືອງສາມັກຄີໄຊ ໜອງຟ້າ ແມ່ນເປັນໜອງນໍ້າທີ່ໃຫຍ່, ມີແປວທາງນໍ້າໄຫຼ ປ່ອງລົງໃສ່ນໍ້າເຊກະໝານ, ເຊິ່ງຕັ້ງຢູ່ທາງທິດຕາເວັນອອກ ຂອງແຂວງອັດຕະປື. ນອນໃນເຂດປ່າສະຫງວນແຫ່ງຊາດ ດົງອໍາພາມ ໃນພື້ນທີ່ຫົວພູຈຸ້ມເຂົ້າຫາກັນ ລະດັບສູງທຽບໃສ່ໜ້ານໍ້າທະເລ 1,200-1,500 ແມັດ, ໃກ້ກັບຊາຍແດນລາວ-ຫວຽດນາມ.
ໄດ້ຄົ້ນພົບໃນລະຫວ່າງປີ ຄສ 1930 ໂດຍຄົນສັນຊາດຝຣັ່ງ ທີ່ມາເປັນຄອມມີແຊ ທີ່ແຂວງອັດຕະປື ຊື່ວ່າ: Commice. Mr. CAME ແລະ Mr. DAP LAY. ໄດ້ສຶກສາຄົ້ນຄ້ວາ ດ້ານທໍລະນີສາດ ໄດ້ໃຫ້ຂໍ້ມູນສັງເກດ ແລະ ສັນນີຖານໄວ້ວ່າ: ຄົງເປັນໜອງທີ່ເກີດຈາກ ພູໄຟລະເບີດ ເມື່ອຫຼາຍລ້ານປີ ປີກ່ອນໜ້ານີ້. ແຕ່ສິ່ງປະທັບໃຈຄື: ນໍ້າໜອງແຫ່ງນີ້ເປັນສີຂຽວ ຄືນໍ້າທະເລ ແລະ ໃສສະອາດ ສາມາດດື່ມໄດ້ ຄືນໍ້າດື່ມບໍລິສຸດ ຫນອງຟ້າ ມີຄວາມກ້ວາງປະມານ 1 ກິໂລແມັດມົນທົນ.
ເມື່ອບໍ່ດົນມານີ້ ນັກດໍານໍ້າ ຈາກປະເທດມາເລຍເຊຍ ໄດ້ດໍາລົງສໍາຫລວດ ເພື່ອຄົ້ນຫາສີ່ງທີ່ຫນ້າອັດສະຈັນ ພາຍໃນພື້ນນໍ້າ ເຖິງຄວາມມະຫັດສະຈັນ ແຕ່ການສໍາຫລວດຄັ້ງນີ້ ຍັງບໍ່ທັນໄດ້ຮັບການລາຍງານເທື່ອ ວ່າ ເປັນແນວໃດ. ຖ້າວ່າ ມີຄວາມຄຶບຫນ້າແນວໃດ ທາງລາຍການຈະນໍາເອົາຜົນການສໍາຫລວດດັ່ງກ່າວ ມາໃຫ້ໄດ້ຮັບຊົມກັນ.
ຫນອງຟ້າ ເປັນແຫລ່ງທ່ອງທ່ຽວທີ່ມີຊື່ສຽງ ແລະ ໄດ້ຮັບຄວາມສົນໃຈຈາກນັກທ່ອງທ່ຽວທັງພາຍໃນ ແລະ ຕ່າງ¬ປະ¬ເທດອັນເນື່ອງມາຈາກຄວາມສວຍງາມ ຈິ່ງເຮັດໃຫ້ຜູ້ຄົນສົນໃຈຕໍ່ແຫລ່ງທ່ອງທ່ຽວແຫ່ງນີ້ຫລາຍຂຶ້ນ. ເຊິ່ງຕັ້ງຢູ່ບໍລິເວນວັງຕັດ ຫ່າງຈາກເທດສະ-ບານເມືອງສາມັກຄີໄຊ ປະມານ 60 ກິໂລແມັດ. ຫນອງຟ້າເກີດມາຈາກສາຍນ້ຳເຊຂະຫມານໄຫລມາ ປະສົມກັບນ້ຳເຊກອງ ຢູ່ບໍລິເວນ ທ່າຂ້າມເຮືອ ໄປເມືອງພູວົງ ສະຖານທີ່ບ່ອນນັ້ນເປັນສາຍນ້ຳທີ່ລ່ອງລົງໃສ່ປະເທດກຳປູເຈຍ
ຫນອງຟ້າເກີດຂຶ້ນ ແລະ ຢູ່ລະຫວ່າງກາງຫົວພູຈຸ້ມເຂົ້າຫາກັນ ຈາກເສັ້ນທາງ 18 B ລະຫວ່າງ ກິໂລແມັດ 100 ເຂົ້າໄປປະມານ 64 ກິໂລແມັດ. ໄປເຖິງບໍລິເວນຫນອງຟ້າ ຖືວ່າເປັນຫນອງນ້ຳທີ່ໃຫຍ່ ມີນ້ຳສີຟ້າ ຕະຫລອດປີ ມີຄວາມກວ້າງປະມານ 1 ກິໂລແມັດ. ສ່ວນຄວາມເລິກຍັງບໍ່ທັນຮູ້ເທື່ອ. ແຕ່ຈາກການສັນນິຖານວ່າ: ຫນອງຟ້າ ອາດເກີດຈາກພູໄຟ ລະເບີດຂຶ້ນເມື່ອຫລາຍພັນປີກ່ອນຈົນເກີດເປັນປ່ອງພູເຂົາໄຟ ຂະຫນາດໃຫຍ່ ກາຍມາເປັນຫນອງຟ້າ ໃຫ້ພວກເຮົາເຫັນໃນປະຈຸບັນນີ້, ຊາວບ້ານໃຫ້ຄວາມເຊື່ອຖືວ່າ ມີແສງໄຟທີ່ສົ່ງແສງຂຶ້ນມາຈາກພື້ນນ້ຳໃນຍາມວັນສິນ ຫລື ມີນ້ຳປູນສີຂາວຂຶ້ນມາຫນ້ານ້ຳ, ແຕ່ພິເສດໄປກວ່ານັ້ນ ໃນຫນອງແຫ່ງນີ້ ມີພຽງແຕ່ປາຄໍ່ ກັ້ງຊະນິດດຽວເທົ່ານັ້ນ, ທີ່ອາໃສຢູ່ ຖ້າຫາກທ່ານໃດສົນໃຈຢາກໄປສຶກສາຕົວຈິງກໍ່ສາມາດໄປຊົມໄດ້ດ້ວຍຕົວເອງ ເຊິ່ງພາກສ່ວນກ່ຽວຂ້ອງ ກໍ່ພ້ອມທີ່ຈະໃຫ້ຂໍ້ມູນ-ຂ່າວສານກ່ຽວກັບສະຖານທີ່ທ່ອງທ່ຽວໃນເຂດເຫລົ່ານີ້. ເຊິ່ງຕັ້ງຢູ່ ເມືອງຊານໄຊ ແຂວງອັດຕະປື ນີ້ເອງ
Editor: ກຳປານາດ ລັດຖະເຮົ້າ
