ແຂວງເຊກອງ ເປັນອີກແຂວງໜຶ່ງໃນ 4 ແຂວງພາກໃຕ້ ທີ່ມີແຫຼງທ່ອງທ່ຽວທີ່ໜ້າສົນໃຈ ແລະ ມີຄວາມໂດດເດັ່ນທາງດ້ານວັດທະນະທຳ. ເມືອເວົ້າເຖິງສະຖານທີ່ທ່ອງທ່ຽວທາງທຳມະຊາດ ຍັງມີອີກສະຖານທີ່ແຫ່ງໜຶ່ງທີ່ໜ້າທ່ຽວ ນັ້ນກໍ່ຄື ຕາດຫົວຄົນ.
ຕາດຫົວຄົນ ໄດ້ຕັ້ງຢູ່ເຊນໍ້ານ້ອຍຕອນເທິງຂອງຕາດແຝກ ເຂດບ້ານດ່ານ, ເມືອງລະມາມ ເປັນແຫຼ່ງທ່ອງທ່ຽວທາງທຳມະຊາດທີ່ສວຍສົດງົດງາມ, ມີຄວາມສູງເຖິງ 8-10 ແມັດ, ແລະ ຍາວ 250 ແມັດ, ເປັນເຂດແດນ ລະຫວ່າງ ແຂວງເຊກອງ ກັບ ແຂວງອັດຕະປື, ຫ່າງຈາກເທດສະບານແຂວງ 19 ກິໂລແມັດ ແລະ ຈາກເສັ້ນທາງເລກທີ 16 ໄປຫານໍ້ຕົກຕາດ 1 ກິໂລແມັດ. ນໍ້າຕົກຕາດແຫ່ງນີ້ ໄດ້ເປີດການບໍລິການນຳໃຊ້ ໃນປີ 1999. ນໍ້າຕົກຕາດຫົວຄົນ ຕາມການບອກເລົ່າຂອງຜູ້ເຖົ້າເຂດບ້ານດ່ານ ແລະ ດອນຈັນ ວ່າ: ກ່ອນຈະໃສ່ຊື່ຕາດຫົວຄົນນັ້ນ ຍ້ອນສະໄໝລະບອບ ຝຣັ່ງຮຸກຮານເຂົ້າມາປົກຄອງຢູ່ລາວ ໄດ້ມີຫົວຄົນຕາຍໄຫຼມາຕົກຄ້າງຢູ່ກ້ອງຕາດດັ່ງກ່າວຢູ່ເລື້ອຍໆ. ສະນັ້ນ ຄົນເຖົ້າຄົນແກ່ໃນຂອບເຂດ ດັ່ງກ່າວ ເລີຍໃສ່ຊື່ຕາດນີ້ວ່າ: ຕາດຫົວຄົນ ຈົນມາເຖິງປະຈຸບັນນີ້.
Editor: ດາວໄຊ ສີວິໄລ
