ໃນເມື່ອບໍ່ດົນນີ້; ຢູ່ທີ່ໂຮງຮຽນມັດທະຍົມຕົ້ນ ດົງນາຂາມ, ເມືອງອາດສະພັງທອງ ແຂວງສະຫັວນນະເຂດ ໄດ້ຈັດພິທີມອບ-ຮັບໂຮງຮຽນຫຼັງໃໝ່ ໂດຍການເຂົ້າຮ່ວມເປັນປະທານຂອງທ່ານ ລໍາທອງ ຂອບສີລາວົງ ເຈົ້າເມືອງອາດສະພັງທອງ, ມີທ່ານ ມາກໂທມັດ ເຢັ້ນນີ້ ເຈົ້າຂອງມູນນິທິເກື້ອຟັນເດັກ, ມີ ຜູ້ອໍານວຍການໂຮງຮຽນອ້ອມຂ້າງເມືອງ, ຄູ-ອາຈານ ແລະ ນ້ອງນັກຮຽນເຂົ້າຮ່ວມ.
ໂຮງຮຽນຫຼັງດັ່ງກ່າວແມ່ນເລີ່ມລົງມືກໍ່ສ້າງມາແຕ່ວັນທີ 20 ເມສາ 2017 ຈົນມາເຖິງ ວັນທີ 20 ກັນຍາ 2017 ແມ່ນໄດ້ສໍາເລັດສົມບູນຕາມລໍາດັບຄາດໝາຍ ໂດຍໄດ້ຮັບແຫຼ່ງທຶນຈາກມູນນິທິເກື້ອຟັນເດັກ ຈາກປະເທດສະວິດເຊີ ແລະ ສົມທົບກັບຊຸມຊົນກຸ່ມບ້ານດົງນາຂາມ ທີ່ໄດ້ຊົມໃຊ້ໃນ 3 ບ້ານຄື: ບ້ານ ດົງນາຂາມ, ບ້ານ ນາຄໍາໃຕ້ ແລະ ບ້ານ ນາຫຼັກ ເປັນຜູ້ປະກອບສ່ວນເຂົ້າໃນການກໍ່ສ້າງໃນຄັ້ງນີ້, ສ່ວນຂະໜາດຄວາມກວ້າງແມ່ນ 6 ແມັດ ຍາວ 48 ແມັດ ແບ່ງອອກເປັນ 6 ຫ້ອງຮຽນ. ເຊິ່ງໂຄງສ້າງກໍ່ດ້ວຍດິນຈີ່ ເສີມເຫຼັກມຸງດ້ວຍກະເບື້ອງ, ມູນຄ່າທັງໝົດໃນການກໍ່ສ້າງແມ່ນ 447.816.000 ກີບ. (ສີ່ຮ້ອຍສີ່ສິບເຈັດລ້ານ ແປດແສນສິບຫົກພັນກີບ) ຈາກນັ້ນ ໃນພິທີກໍ່ໄດ້ມີການມອບໂຮງຮຽນຫຼັງດັ່ງກ່າວເຊິ່ງເປັນກຽດມອບໃນຄັ້ງນີ້; ໂດຍທ່ານ ມາກໂທມັດ ເຢັ້ນນີ້ ເຈົ້າຂອງມູນນິທິເກື້ອຟັນເດັກ, ໂດຍການກ່າວຮັບຂອງທ່ານ ລໍາທອງ ຂອບສີລາວົງ ເຈົ້າເມືອງອາດສະພັງທອງ ຫຼັງຈາກນັ້ນ ກໍ່ໄດ້ມອບໃຫ້ຫົວໜ້າຫ້ອງການສຶກສາທິການ ແລະ ກິລາເມືອງ ແລະ ມອບຕໍ່ໃຫ້ຜູ້ອໍານວຍການໂຮງຮຽນມັດທະ ຍົມຕົ້ນດົງນາຂາມ ແລະ ຊຸມຊົນໃນ 3 ບ້ານ ໄປນຳໃຊ້ ແລະ ປົກປັກຮັກສາ ຕໍ່ໄປ.
Editor: ນັກຂ່າວເມືອງອາດສະພັງທອງ
