ເມືອງນານ ແຂວງຫລວງພະບາງ ໄດ້ຈັດພິທີສະເຫລີມສະຫລອງປີທ່ອງທ່ຽວລາວ 2018 ໃນວັນທີ 28 ເມສາ ຜ່ານມານີ້ ໂດຍມີ ທ່ານ ບົວຄົງ ນາມມະວົງ, ຮອງເຈົ້າແຂວງຫລວງພະບາງ ພ້ອມດ້ວຍການນຳຂອງແຂວງ, ເມືອງ, ປະຊາຊົນ, ແຂກທັງພາຍໃນ ແລະ ຕ່າງປພເທດເຂົ້າຮ່ວມ.
ໃນພິທີ ທ່ານ ບຸນທີ ມະນີວົງ ຮອງເຈົ້າເມືອງ ເມືອງນານ ໄດ້ຜ່ານບົດລາຍງານ ການສະເຫລີມສະຫລອງປີທ່ອງທ່ຽວລາວ 2018 ຂອງເມືອງນານ ຖືວ່າເປັນຄັ້ງປະຫວັດສາດ ໂດຍທຸກພາກສ່ວນຂອງສັງຄົມພາຍໃນເມືອງໄດ້ມີສ່ວນຮ່ວມຢ່າງຕັ້ງໜ້າ ໃນການປະຕິບັດນະໂຍບາຍຂອງພັກ ກ່ຽວກັບແຜນຍຸດທະສາດຂອງແຂວງ ກໍ່ຄື ການສະເຫລີມສະຫລອງປີທ່ອງທ່ຽວລາວ 2018 ສະເພາະເມືອງນານ ໄດ້ຈັດຂຶ້ນຕິດພັນກັບງານບຸນບັ້ງໄຟ ທີ່ເປັນບຸນປະເພນີທີ່ເປັນເອກະລັກ ຂອງຊາວເມືອງນານ ທີ່ພ້ອມກັນສືບທອດມາແຕ່ບູຮານນະການ ເຊິ່ງຈະໄດ້ສົ່ງເສີມໃຫ້ກາຍເປັນງານບຸນມະຫາກຳການທ່ອງທ່ຽວໃນອານາຄົດ. ເມືອງນານເປັນເມືອງເຊື່ອມຕໍ່ປະຕູເຂົ້າ-ອອກ ຂອງນະຄອນ-ຫລວງພະບາງ ກັບ ແຂວງໄຊຍະບູລີ ແຂວງວຽງຈັນ, ມີທ່າແຮງທາງດ້ານການທ່ອງທ່ຽວທາງດ້ານວັດທະນະທຳ ແລະ ທຳມະຊາດທີ່ອຸດົມສົມບູນ, ອັນພົ້ນເດັ່ນແມ່ນ ງານຊ່ວງເຮືອໃນບຸນອອກພັນສາ, ບຸນເຂົ້າກໍາ, ບຸນມະຫາຊາດ, ບຸນກຸ້ມເຂົ້າ, ບຸນກິນຈຽງເຜົ້າມົ້ງ, ບຸນກະເຣີ ເຜົ່າກື່ມມຸ, ທ່ຽວຊົມຕາດຮ່ຽນ, ຕາດບ້ານນານວນ, ຖ້ຳຜາດັງຄວາຍ, ຖ້ຳເຈຍ, ຖ້ຳນົກແອ່ນ, ຖ້ຳໜອງບົວ, ຖ້ຳໄກ່ແກ້ວ, ຖ້ຳຜານ້ຳທ່ຽງ, ຫົວນ້ຳອອກບ້ານທົ່ງຄັງ, ລ່ອງເຮືອທ່ຽວຊົມທໍາມະຊາດໜ້າເຂື່ອນໄຟຟ້ານ້ຳຂອງ ແລະ ອື່ນໆ.
ສຳລັບ ກິດຈະກຳທີ່ຈັດຂຶ້ນໃນໄລຍະການສະເຫລີມສະຫລອງປີທ່ອງທ່ຽວລາວ 2018 ແລະ ບຸນບັ້ງໄຟ ປະຈຳປີຂອງເມືອງນານ ປະກອບມີ: ການເປີດຕະຫລາດນັດຂາຍສີນຄ້າ, ການສະແດງສີລະປະວັນນະຄະດີ, ການແຂ່ງຂັນຈູດບັ້ງໄຟດອກ, ຕີກອງຍາວ, ປະກວດ ແລະ ຈູດບັ້ງໄຟຫາງ, ໃສ່ບາດ-ວຽນທຽນ ແລະ ຄົບງັນຕາມປະເພນີ.
Editor: ວິທະຍຸກະຈາຍສຽງແຫ່ງຊາດ
