ສະຫວັນນະເຂດ ເຊິ່ງເປັນອີກແຂວງໜຶ່ງ ທີ່ເອື້ອອໍານວຍຄວາມສະດວກຮອບດ້ານໃນການພັດທະນາ ແລະ ສົ່ງເສີມການທ່ອງທ່ຽວ ນອກນັ້ນ ຍັງຮັກສາຮີດຄອງປະເພນີ ອັນດີງາມຂອງແຕ່ລະເຜົ່າຊົນ.
ສະຫວັນນະເຂດ ເປັນແຂວງໜຶ່ງທີ່ຕັ້ງຢູ່ພາກກາງຂອງ ສປປ ລາວ ເຊິ່ງມີຊາຍແດນຕິດຈອດກັບບັນດາແຂວງໃກ້ຄຽງ ແລະ ປະເທດໃກ້ຄຽງ. ປັດຈຸບັນແຂວງສະຫວັນນະເຂດ ມີແຫ່ງທ່ອງທ່ຽວຫຼາຍແຫ່ງທີ່ໄດ້ເປີດບໍລິການ, ຄຽງຄູ່ກັບສິ່ງຮອງຮັບນັບມື້ເພີ່ມຂຶ້ນ. ນອກນັ້ນ ຍັງມີຄວາມໂດດເດັ່ນທາງດ້ານວັດທະນະທຳ ແລະ ປະຫວັດສາດ. ເມື່ອເວົ້າເຖິງສະຖານທີ່ແຫ່ງນີ້ ນັ້ນກໍ່ຄື ຫໍວາງສະແດງ ພິພິທະພັນກະດູກໃດໂນເສົາ ເຊິ່ງຕັ້ງຢູ່ທີ່ບ້ານທ່າເມືອງ, ນະຄອນໄກສອນພົມວິຫານ, ແຂວງສະຫວັນນະເຂດ ເຊິ່ງໄດ້ເປີດບໍລິການ ມາແຕ່ປີ 2000 ຈົນເຖິງປັດຈຸບັນນີ້ ຫໍພິພິທະພັນ ວາງສະແດງກະດູກໃດໂນເສົາ ເປັນສະຖານທີ່ ບ່ອນລວບລວມສິ່ງເກົ່າແກ່ ທາງດ້ານຊີວະສາດ, ທໍລະນີວິທະຍາ ທີ່ໄດ້ຄົ້ນພົບໃນຫລາຍສະຖານທີ່ມາລວມກັນ ເຊັ່ນ: ເຕົ່າຫີນ, ຫອຍຫີນ, ໄມ້ທີ່ກາຍເປັນຫີນ, ແຂ້ວຊ້າງຫີນ ແລະ ຊາກກະດູກໃດໂນເສົາ ຫຼື ຊາວບ້ານເອີ້ນວ່າ: ກະປອມຫຼວງ ທີ່ມີອາຍຸ 110 ລ້ານກວ່າປີ, ການຄົ້ນພົບກະດູກໃດໂນເສົາ ແມ່ນຄົ້ນພົບ ຢູ່ບ້ານຕັ່ງຫວາຍ, ເມືອງຊົນບູລີ ແຂວງສະຫວັນນະເຂດ ເຊິ່ງມີ 4 ຊະນິດ: ຊະນິດ ໂຊໂລໂປດ (sauropode), ຊະນິດ ເຕໂລໂປດ (Theropode), ຊະນິດ ອີກົວໂນ (Igaunont), ຊະນິດ ສິດຕາໂກຊໍ ສະຖານທ່ອງທ່ຽວແຫ່ງນີ້ ສາມາດເຂົ້າທ່ຽວຊົມໄດ້ທຸກມື້ ໃນໂມງລັດຖະການ ແລະ ມີການບໍລິການ ດ້ວຍຜູ້ບັນລະຍາຍ.
Editor: ດາວໄຊ ສີວິໄລ
