ຖ້ຳນ້ຳລອດ ເຊບັ້ງໄຟ ຖ້ຳທີ່ໄດ້ຮັບການຂະຫນານນາມວ່າ ງາມທີ່ສຸດ-ໃຫຍ່ທີ່ສຸດໃນລາວ, ເຊິ່ງຕັ້ງຢູ່ທາງທິດຕາເວັນຕົກສ່ຽງເຫນືອ ຂອງປ່າສະຫງວນແຫ່ງຊາດ ພູຫີນຫນາມໜໍ່, ເຂດເມືອງບົວລະພາ, ແຂວງຄຳມ່ວນ.
ຖ້ຳນ້ຳລອດເຊບັ້ງໄຟ ດ້ານໃນເປັນຫ້ອງໂຖງຂະຫນາດໃຫຍ່ ແລະ ມີຄວາມສວຍງາມໂດດເດັ່ນ ປະທັບໃຈ ແລະ ມີຄວາມອັດສະຈັນທີ່ສຸດ, ພາຍໃນຖ້ຳແມ່ນມີລັກສະນະໂຄ້ງກົ່ງ- ສູງ,ມີຂະຫນາດກວ້າງຂວາງ ນັກສຳຫລວດໄດ້ເອີ້ນຊື່ພາຍໃນຫ້ອງໂຖງນີ້ວ່າ: ຫໍວິຫານ, ມີທັງຫີນ ງອກ ຂະຫນາດໃຫຍ່ຕັ້ງໃກ້ກັບປາກຖ້ຳ. ພາຍໃນຖ້ຳແຫ່ງນີ້ ແມ່ນຖືກຕົບແຕ່ງດ້ວຍທຳມະຊາດຢ່າງສວຍສົດງົດງາມ, ເປັນຕົ້ນ ຫີນທີ່ມີລັກສະນະຄ້າຍຄືກັບຕົ້ນໄມ້ ມີຄວາມຍາວຕິດຕໍ່ກັນ ຍາວເຖິງ 3 ກີໂລແມັດ. ສ່ວນທາງບໍລິເວນປາກຖ້ຳເບື້ອງລຸ່ມ ມີກ້ອນຫີນຮູບ 4 ຫລ່ຽມ ເອີ່ນວ່າ: ຫີນໄຂມຸກ ຍັງຍາຍຕາມພື້ນຖ້ຳ, ຫີນດັ່ງກ່າວເກີດຈາກການສະສົມຂອງທາດຫີນປູນໂຮມກັນເປັນອ່າງ, ເປັນລອກລອກ. ຖ້ຳນ້ຳລອດເຊບັ້ງໄຟ ແມ່ນມີຄວາມສວຍງາມ ແລະ ເຕັມໄປດ້ວຍສິ່ງໃຫຍ່ໂຕ ມະໂຫຖານເປັນພິເສດ ເຊັ່ນ: ກາບຂອງຫີນປູນຂະຫນາດໃຫຍ່ ແລະ ຫີນງອກ ທີ່ງົດງາມ. ຖ້ຳດັ່ງກ່າວໄດ້ຖືກສຳຫລວດຄັ້ງທຳອິດ ໃນປີ ຄສ 1905 ຫລື 114 ປີຜ່ານມາ, ເບື່ອງຕົ້ນໄດ້ມີນັກສຳຫລວດຊາວຝຣັ່ງ. ຕໍ່ມາໃນປີ 1995 ໄດ້ມີທີມນັກສຳຫລວດຈາກປະເທດຝຣັ່ງ ໄດ້ກັບມາສຳຫລວດຄັ້ງໃຫມ່, ໄດ້ພຽງແຕ່ຂໍ້ມູນສ່ວນຫນຶ່ງ ແລະ ການສຳຫລວດຍັງບໍ່ທັນສຳເລັດ. ມາໃນປີ 2006 ທ່ານ ຈອນໂພເລັກ ຜູ້ທີ່ມີຄວາມຊ່ຽວຊານດ້ານຖ້ຳ ໄດ້ນຳພາທີມງານຂອງລາວ ເຂົ້າໄປສຳຫລວດພາຍໃນຖ້ຳ ຈິ່ງຮູ້ວ່າ ຖ້ຳນີ້ມີຄວາມໃຫຍ່ຫລາຍ ແລະ ມີຄວາມສວຍງາມຫລາຍ ຈິ່ງຮູ້ວ່າ ຖ້ຳນີ້ມີຄວາມຍາວ ທັງໝົດ 11 ກິໂລ ແມັດ ເປັນຖ້ຳທີ່ມີສາຍນ້ຳເຊບັ້ງໄປໄຫລຜ່ານ.
ສະຖານທີ່ຖ້ຳນ້ຳລອດເຊບັ້ງໄຟ ໄດ້ເປີດໃຫ້ເປັນສະຖານທີ່ທ່ອງທ່ຽວຢ່າງເປັນທາງການ ໃນກາງ ປີ 2013 ເພື່ອເປັນການດຶງດູດ ແລະ ເປີດປະຕູຕ້ອນຮັບເອົານັກທ່ອງທ່ຽວຈາກຕ່າງປະເທດ ແລະ ພາຍໃນ ໄດ້ເຂົ້າໄປທ່ຽວຊົມ ແລະ ສຳຜັດກັບຄວາມງາມອັນມະຫັດສະຈັນ ທີ່ເປັນຂອງຂວັນ ຈາກທຳມະຊາດ ສ້າງໄວ້ ໃຫ້ໄດ້ເຫັນເຖິງຄຸນຄ່າຄວາມສວຍສົດງົດງາມຢ່າງຫນ້າອັດສະຈັນ. ເຊື່ອແນ່ວ່າ ໃນອະນາຄົດ ຖ້ຳແຫ່ງນີ້ ອາດຖືກສະເຫນີໃຫ້ເປັນມໍລະດົກໂລກ ທາງດ້ານທໍລະນິວິທະຍາ ແລະ ດ້ານ ຊີວະນານາພັນ ກໍ່ເປັນໄດ້.
ບກ: ກຳປານາດ ລັດຖະເຮົ້າ KAMPANATH lathahao
